काठमाडौं । ललितपुरको गोदावरी नगरपालिका- ३ बुलु स्थित दिव्य ज्योति आश्रम बुलुको उद्घाटन सम्पन्न भएको छ । आइतबार अन्तर्राष्ट्रिय आध्यात्मिक व्यक्तित्व श्री विभूजी महाराजजी, श्री आराध्या माताजी र गोदावरी नगरपालिकाका नगरप्रमुख गजेन्द्र महर्जनले संयुक्त रूपमा आश्रमको उद्घाटन गरेका हुन् ।
उद्घाटनपछि स्वागत मन्तव्य राख्दै मेयर महर्जनले स्थानीय तह निर्वाचन लगतै धार्मिक कार्यक्रममा सहभागी हुन पाउँदा खुशी लागेको बताए । उनले भने,' म निर्वाचित भएपछि पहिलो पटक यस्तो धार्मिक कार्यक्रममा भाग लिन पाउँदा र यहाँ विभूजी महाराजजी, श्री आराध्या माताजी र श्रीयांशजीलाई स्वागत गर्न पाउँदा खुशी लागेको छ ।'
उनले मानिसले सधैँ आत्माको कल्याण हुने काम गर्नुपर्ने बताए । उनले भने,'हामीले आफ्नो कल्याण हुने काम गर्नुपर्छ र त्यो सही बाटो यही हो ।'
कार्यक्रममा अन्तर्राष्ट्रिय आध्यात्मिक व्यक्तित्व श्री विभूजी महाराजजीले नेपाल आउन पाउँदा खुशी लागेको बताए । उनले बुलुमा आश्रम बन्नु भनेको बुलुका स्थानीयका लगी कल्याणको मार्ग भएको बताए ।
कार्यक्रममा नगरप्रमुख गजेन्द्र महर्जन, उप-प्रमुख, मुना अधिकारी वडा नम्बर ३ का वडाध्यक्षलाई रुद्राक्षको मला लगाएर समितिले धन्यवाद ज्ञापन गरेको थियो ।
सो कार्यक्रममा आश्रम बनाउन जग्गा दिने दातालाई सम्मान गरिएको थियो । स्व: मानसुन्दर महर्जनका छोरा गणेश बहादुर महर्जन र अर्जुन महर्जनलाई सम्मान गरिएको थियो ।
२ आना रहेको सो जग्गा २०४३ सालमा स्व: मानसुन्दर महर्जनले मानव धर्म सेवा समितिलाई दान गरेका थिए । सो स्थानमा आश्रम पुरानो भएपछि नयाँ निर्माण गरिएको हो ।
