निर्वाचनमा असहयोग गर्ने बाँके कांग्रेसका तीन दर्जन नेताकार्यकर्ता कारबाहीको दायरामा

हाम्रा कुरा

प्रकाशित २०७९ जेठ १७ मंगलबार

नेपालगन्ज । नेपाली कांग्रेस बाँकेको जिल्ला अनुशासन शाखाले वैशाख ३० गते भएको पालिका निर्वाचनमा पार्टीका उम्मेदवारलाई असहयोग गर्ने तीन दर्जन नेता तथा कार्यकर्तालाई स्पष्टीकरण सोध्न जिल्ला कार्यसमितिलाई सिफारिस गरेको छ ।

जिल्ला अनुशासन शाखाका संयोजक टङ्कप्रसाद काफ्ले (आशिष्) को अध्यक्षतामा मङ्गलवार दिउँसो बसेको बैठकले तल्ला कमिटीबाट आएका सिफारिसलाई अनुमोदन गर्दै जिल्ला कार्यसमितिलाई पठाएको हो । अब जिल्ला कार्यसमितिले उनीहरूलाई स्पष्टीकरण सोध्नेछ । स्पष्टीकरण चित्त नबुझे कारबाहीका लागि प्रदेश समितिलाई सिफारिस गर्ने कांग्रेस बाँकेका सभापति नारायणप्रसाद गौडेलले बताए ।

पालिकाको चुनावमा कांग्रेसका आधिकारिक उम्मेदवारहरूलाई असहयोग गरेपछि तल्ला कमिटीले ती नेता तथा कार्यकर्ताहरूको नाम लिस्टिङ गरेर अनुशासन शाखामा पठाएका थिए ।