कश्मीरमा उत्पादन हुने ब्याटले लियाे अन्तर्राष्ट्रिय बजार

हाम्रा कुरा

प्रकाशित २०७९ असार ६ सोमबार

काठमाडौं। भारतस्थित कश्मीरको ब्याट उत्पादन गर्ने उद्योगले मारेको ठूलो फड्को स्वरुप तीन अन्तर्राष्ट्रिय क्रिकेट टीमले कश्मीरमा उत्पादन हुने चर्चित विलो ब्याट किन्ने भएका छन् ।

सन् १९४७ देखि कश्मीरमा लाखौं विलो ब्याट उत्पादन हुँदै आएका थिए। तर गत वर्ष ओमानी खेलाडी बिलाल खान र नसीम खुशीले टी–२० विश्वकपमा कश्मीरी विलो ब्याट प्रयोग गरेपछि मात्रै यसले अन्तर्राष्ट्रिय बजारमा स्थान बनाएको थियो ।

स्थानीय ब्याट उत्पादक एकाइका अनुसार करिब क्रिकेट खेल्ने नौ राष्ट्रका आयातकर्ताले विलो ब्याटका लागि अर्डर दिएका छन् । यस वर्ष अष्ट्रेलियामा हुने एसिया कप र टी–२० विश्वकपमा कश्मीरी ब्याट खेल्ने उनीहरुको भनाइ छ।

'अफगानिस्तान, बंगलादेश, युएई, कतार, बहराइन, पाकिस्तान, श्रीलंका, न्यूजिल्यान्ड, दक्षिण अफ्रिका र डेनमार्क कश्मीरी विलो ब्याट प्रयोग गर्न सहमत भएका छन्,' जीआर ८ स्पोर्टका मालिक फवजुल कबीरले भने ।

उपत्यकाका ब्याट उत्पादकहरू उनीहरूको उत्पादनले अन्तर्राष्ट्रिय मापदण्ड पूरा गरेकोमा उत्साही भएको उनले बताएका छन् ।

कबीरले आफ्नो कम्पनीले हालै अफगानिस्तान राष्ट्रिय टोलीका ६ जना क्रिकेटरहरूसँग उनको ब्याट प्रयोग गर्न सम्झौता गरेकोसमेत बताएका छन् ।

इतिहासमा पहिलो पटक गत अक्टोबरमा आईसीसी टी–२० विश्वकपमा कश्मीरी विलो ब्याट प्रयोग भएकाले टिमले अंग्रेजी विलोभन्दा कश्मीरी ब्याटलाई प्राथमिकता दिनेमा आफूहरु आशावादी रहेको उनले बताएका छन्।