काठमाडौं । पाँचौं टेष्टको शृङ्खलाको अन्तिम खेलमा इंग्ल्याण्डले भारतलाई ७ विकेटले पराजित गर्यो । यो नतिजासँगै भारतीय टोलीको १५ वर्षपछि इंग्ल्याण्डमा सिरिज जित्ने सपना अधुरो रह्यो भने इंग्ल्याण्डले टेष्ट इतिहासमा आफ्नो सबैभन्दा ठूलो जित हासिल गरेको छ ।
भारत विरुद्ध ३७८ रनको विशाल लक्ष्य पछ्याउँदै टोलीले टेष्ट इतिहासमा आफ्नो सबैभन्दा ठूलो जित हासिल गरेको हो । यसअघि इंग्ल्याण्डको टोलीले यति ठूलो लक्ष्य हासिल गरेको थिएन। यो जितमा दोस्रो इनिङ्समा शतक प्रहार गरेका जो रुट र जोनी बेयरस्टोको महत्त्वपूर्ण योगदान रहेको थियो । दुवैले २ सय ६९ रनको अतुलनीय साझेदारी गर्दै टोलीलाई जित दिलाएका थिए ।
भारतले पहिलो इनिङ्समा ४१६ रन बनाएको थियो । पहिलो इनिङ्समा इंग्ल्याण्डलाई २८४ रनमा अलआउट गरेपछि १ सय ३२ रनको महत्त्वपूर्ण अग्रता लिएको थियो।
दोस्रो इनिङ्समा भारतीय टोलीले २४५ रन मात्र बनाउन सके र इंग्ल्याण्डलाई ३७९ रनको लक्ष्य दिएको थियो । खेलको अन्तिम दिन कुनै विकेट नगुमाई बेयरस्टो र रुटले लन्चअघि नै टोलीलाई जित दिलाएका थिए । यस खेलका दुवै इनिङ्समा शतक प्रहार गरेका बेयरस्टो खेलको प्लेयर अफ द म्याच घोषित भए ।
