मातेका एमाले सदस्यले चलाएको गाडीले सेनाका अमल्दारलाई ठोक्यो, उपचारका क्रममा मृत्यु
हाम्रा कुरा
प्रकाशित २०७९ साउन २ सोमबार
412
Shares
भरतपुर । रक्सी पिएर गाडी चलाएका वडा सदस्यको गाडिले ठक्कर दिँदा नेपाली सेनाका अमल्दारको मृत्यु भएको छ । भरतपुर महानगरपालिका-१९ का वडा सदस्य राजकुमार गुरुङको गाडीले ठक्कर दिँदा नेपाली सेनाका अमल्दार सुरज गुरुङको मृत्यु भएको छ ।
वडा सदस्य गुरुङले मादक पदार्थ सेवन गरेको पाइएको कार्यालयका प्रहरी नायब उपरीक्षक रबिन विष्टले जानकारी दिए । पक्राउ परेका गुरुङ हालै मात्रै नेकपा (एमाले)बाट वडा सदस्यमा निर्वाचित भएका हुन् ।
मङ्गलपुरबाट रामपुरतर्फ जाँदै गरेको गुरुङ चढेको ग२च ९०६२ नंको गाडीले भरतपुर महानगरपालिका-१५ शीतलचोक नजिक विपरीत दिशाबाट आउँदै गरेको बा३३प १४५५ नंको मोटरसाइकललाई ठक्कर दिएको थियो ।
जिल्ला प्रहरी कार्यालय चितवनका अनुसार गाडीको ठक्करबाट मोटरसाइकलमा सवार कालीबहादुर गणमा कार्यरत अमल्दार तनहुँको व्यास नगरपालिका-१२ घर भएका ३३ वर्षीय सुरज गुरुङको मृत्यु भएको हो । उनको उपचारका क्रममा चितवन मेडिकल कलेजमा मृत्यु भएको प्रहरीले जनाएको छ ।
कार र चालक वडा सदस्य प्रहरीको नियन्त्रणमा रहेका छन् ।
