पोखरा । राष्ट्रिय खेलकुद परिषद (राखेप) का सदस्य सचिव टंकलाल घिसिङले नवौं राष्ट्रिय खेलकुद सफल बनाउन सहकार्य आवश्यक रहेको बताएका छन् । नेपाल भूतपूर्व खेलाडी मञ्चद्वारा सदस्य सचिव घिसिङको सम्मानमा आयोजित बधाइ तथा स्वागत कार्यक्रममा उनले यस्तो बताएका हुन् । उनले भने, “म जुन कार्यक्रममा उपस्थित हुन्छु, त्यहाँ सहयोग गर्छौं भन्ने कुरा सुन्छु । मलाई सहयोगको खाँचो होइन सहकार्य गर्छौं भन्ने प्रतिवद्धताको खाँचो छ ।” 

खेलकुद विकासमा पोखरा आफ्नो दोश्रो घर हुने बताउँदै सदस्य सचिव घिसिङले पोखराको सामिप्यता र सहकार्य अत्यन्तै बलियो हुने भनाइ अघि सार्दै उनले खेलकुद विकासका लागि आफूले इमान्दार प्रयत्न गर्ने उल्लेख गरे ।

उनले भने, “नेपाली खेलकुद विकासमा अग्रज खेलाडीहरुको योगदान महत्वपूर्ण छ । हामीले नयाँ युगको खेलकुदलाई उचाँईमा पुर्याउन अनुभूति हुने गरी काम गरौं सहयोग होइन, सहकार्य गरौं ।” 

पर्खाल निर्माण गरेर पोखरा रंगशालाको संरक्षण गर्ने अभियानमा मञ्चले महत्वपूर्ण योगदान दिएको उल्लेख गर्दै उनले सहयोगीहरुलाई सम्मानका लागि निःशुल्क कार्डको व्यवस्थापन गर्न सहयोग गर्ने बताए । 

उनले खेलकुद विकासका लागि गरिएको योगदानको देशभर सन्देश पुर्याउनेसमेत बताए । अग्रज खेलाडीहरुको विचमा आफूलाई पाउँदा निकै खुसी लागेको बताउँदै सदस्य सचिव घिसिङले पोखरेलीहरुलाई नवौं राष्ट्रिय खेलकुदमा आफ्नो अपनत्व संगै स्वामित्व प्राप्त हुने गरी वातावरण बनाउने प्रतिवद्धता जनाए ।

उनले नवौंका लागि आवश्यक बजेटकोसमेत व्यवस्था भइसकेको उल्लेख गर्दै पोखरा लगायत अन्य ठाउँमा हुने म्याराथनका रुटहरुको प्रमाणिकरण गर्न राखेपले सहयोग गर्ने प्रतिवद्धता जनाए । 

कोभिड १९ पछि समेत खेलकुद अझै गतिशील हुन नसकेको धारणा अघि सार्दै सदस्य सचिव घिसिङले नवौं राष्ट्रिय खेलकुदले नेपाली खेलकुद विकासका लागि ‘आइस व्रेक’ गर्ने बताए । उनले नवौं सकिएलगतै नेपाली खेलाडीहरुलाई एक वर्षभरि नै अन्तर्राष्ट्रियस्तरको प्रशिक्षण संगै श्रंखलावद्ध अन्तर्राष्ट्रियस्तरका प्रतियोगिताहरुको आयोजना गर्ने तयारी परिषदले शुरुआत गर्ने बताए । 

उनले १४ औं साग, १९ औं एशियाली खेलकुद र पेरिस ओलम्पिकको तयारीमा जुट्ने पनि बताए । उनले भने, “हामी अहिलेको तयारीबाट एशियाली र ओलम्पिकबाट धेरै आशावादी त छैनौं तर कम्तिमा पनि एक स्वर्ण पदक जित्नु पर्छ भन्ने सोंचका साथ खेलाडीलाई निरन्तर प्रशिक्षणमा जुटेका छौं ।” नेपाली खेलाडी ओलम्पिकमा सहभागिताका लागि मात्रै नभएर छनोट चरण पार गर्दै त्यहाँसम्म पुग्ने र पदकसमेत जित्ने गरी तयारी गरिरहेको उनले बताए । 

नेपाली खेलकुद विकासका लागि राष्ट्रिय खेलकुद नीति आवश्यक रहेको कुरामा जोड दिंदै सदस्य सचिव घिसिङले भने, “हरेक पटक फेरिने सरकार र सदस्य सचिवले आफू बमोजिम ‘कस्मेटिक’ खेलकुद नीति अवलम्वन गर्दा खेलकुद विकासबाट पटक-पटक चुकेको छ । यो परम्परालाई तोडिन आवश्यक छ । हामी हतार नगरी व्यापक छलफल चलाएर सबै नेपालीको साझा खेलकुद निति निर्माण गर्ने तयारी गर्नेछौं ।”

सदस्य सचिव घिसिङले जुनियर, यूथ र विश्वविद्यालयस्तरमा खेलकुदको विकासका लागि राखेपले तयारी थाल्ने समेत बताए । “अहिले केही विद्यालय र विश्वविद्यालयस्तरमा प्रतियोगिताहरु सञ्चालन भए पनि ति आयोजनाका लागि मात्रै भएका छन्, अब त्यसो हुने छैन । खेलाडी उत्पादनको मुख्य थलो बन्ने गरी विद्यालय र विश्वविद्यालयहरुमा प्रतियोगिताहरु आयोजना हुनेछन्”, उनले भने, “अब नेपाली खेलकुदले यूथ स्पोर्टस् खेलको विकासका लागि अघि बढ्ने छ ।” उनले नेपाली खेलकुद विकासका लागि निजी क्षेत्रको साझेदारीमा समेत जोड दिए । 

मञ्चका अध्यक्ष हरिप्रसाद पराजुलीको अध्यक्षतामा भएको कार्यक्रममा मञ्चका निवर्तमान अध्यक्ष तथा प्रदेश खेलकुद परिषदका सदस्य सचिव तेजबहादुर गुरुङ, संस्थापक अध्यक्ष खड्ग रानाभाट, द्वित्तीय उपाध्यक्ष दिल बहादुर गुरुङ, सल्लाहकार जगन बहादुर गुरुङलगायतले नेपाली खेलकुद विकासमा अग्रज खेलाडीहरुको भूमिका र पोखरा म्याराथनका बारे सदस्य सचिव घिसिङलाई जानकारी गराएका थिए ।