इस्लामावाद । पाकिस्तानका पूर्वप्रधानमन्त्री इमरान खानले न्यायिक अधिकारीको आलोचना गरेकोमा माफी मागेको उनका वकीलले बिहीबार बताएका छन् ।
अन्तर्राष्ट्रिय प्रसिद्ध क्रिकेट खेलाडीबाट राजनीतिज्ञ बनेका खानलाई गत अप्रिलमा अविश्वासको प्रस्तावमार्फत सत्ताच्युत गरिएको थियो तर उनले आफ्नो पुनरागमनको योजना बनाइरहरेका छन् ।
बिहीबार उनी इस्लामाबाद उच्च अदालतमा उपस्थित भएका थिए, जहाँ उनले आफ्नो एक निकट सहयोगीलाई हिरासतमा लिएपछि दिएको टिप्पणीका लागि माफी माग्न नसके अदालतको अवहेलनाको अभियोग लगाइने खतरा थियो ।
“सबैले अदालतको सम्मान गर्नुपर्छ र आज उनले यही देखाउनुभउको छ,” पूर्व प्रधानमन्त्री खानका वकिल फैजल चौधरीले एएफपीसँग भने ।
चौधरीले भने, “यदि उनले कानुनी रूपमा केही गल्ती गरेमा त्यसका लागि माफी माग्नुहुन्छ । अब अवहेलना मुद्दा फिर्ता हुने सम्भावना धेरै छ ।”
पाकिस्तानका अदालतहरूलाई प्रायः सांसदहरूलाई थकाऊ र लामो समयसम्म घुमाउरो कार्यवाहीमा बाँध्न प्रयोग गरिन्छ जुन अधिकार अनुगमनकर्ताहरूले राजनीतिक विपक्षलाई दबाउन प्रयोग हुने गर्छ भनी आलोचना गरिने गरेको छ ।
खानले पत्रकारसँगको कुराकानीमा भने, “मेरो लडाई पाकिस्तानको न्यायपालिकासँग होइन । अहिले म वास्तविक स्वतन्त्रताका लागि युद्ध लडिरहेको छु ।”
खानका वकीलले यो मुद्दा प्राविधिक रूपमा अझै सक्रिय रहेको र उनले औपचारिक रूपमा ‘क्षमायाचना–पत्र’ पेश गर्ने बताएका छन् ।
यदि उनलाई अदालतको अवहेलनाको अभियोगमा दोषी ठहर गरियो भने पाकिस्तानको संविधानले खानलाई आगामी पाँच वर्षका लागि पद धारण गर्न अयोग्य ठहर्याउन सक्छ ।
पाकिस्तानमा सन् २०२३ को अन्त्यसम्ममा आम निर्वाचन हुने कार्यक्रम रहेको छ ।
