इमरान खानलाई १७ वर्ष जेल सजाय, देशव्यापी आन्दोलनको तयारी
इमरान र बुशरा बिबीलाई कडा सजाय, पिटिआईद्वारा 'राजनीतिक प्रतिशोध' को आरोप
हाम्रा कुरा
प्रकाशित २०८२ पुष ६ आइतबार
1.8k
Shares
काठमाडौँ | पाकिस्तानका पूर्व प्रधानमन्त्री इमरान खान र उनकी धर्मपत्नी बुशरा बिबीलाई तोसाखाना–२ भ्रष्टाचार मुद्दामा १७ वर्षको जेल सजाय सुनाइएको छ। अदालतको यो फैसलापछि खानले आफ्ना समर्थकहरूलाई देशव्यापी विरोध प्रदर्शनका लागि तयार रहन आह्वान गरेका छन्।
हाल हिरासतमा रहेका खानले आफ्नो कानुनी टोलीमार्फत सन्देश पठाउँदै खैबर पख्तुनख्वाका मुख्यमन्त्री सोहेल अफ्रिदीलाई सामूहिक सडक आन्दोलनको तयारी सुरु गर्न निर्देशन दिएका हुन्। उनले सन्देशमा भनेका छन्, “सम्पूर्ण राष्ट्र आफ्ना अधिकारका लागि उठ्नुपर्छ।” खानले यो फैसलालाई विगत तीन वर्षदेखि भइरहेका ‘आधारहीन निर्णयहरूको निरन्तरता’ भन्दै यसलाई उच्च अदालतमा चुनौती दिने सङ्केत दिएका छन्।
राजनीतिक प्रतिशोधको आरोप इमरान खानको पार्टी पाकिस्तान तहरिक–ए–इन्साफ (पिटिआई) ले यो फैसलालाई ‘असंवैधानिक, अवैध र राजनीतिक प्रतिशोधको चरम रूप’ भनेको छ। पार्टीका महासचिव सलमान अकरम राजाले पत्रकार सम्मेलन गर्दै यो मुद्दा ठोस प्रमाण र साक्षीबिना केवल प्रतिज्ञापत्रमा मात्र आधारित रहेको दाबी गरे। उनले खानको भनाइ उद्धृत गर्दै भने, “म दृढ छु र कसैसँग माफी माग्ने छैन।”
के हो तोसाखाना–२ मुद्दा? यो मुद्दा साउदी क्राउन प्रिन्सबाट उपहारस्वरूप प्राप्त करिब ७ करोड १० लाख पाकिस्तानी रुपैयाँभन्दा बढी मूल्यको 'बुल्गारी गहना सेट' को अवमूल्यनसँग सम्बन्धित छ। खान र बुशरा बिबीलाई आपराधिक विश्वासघात र भ्रष्टाचार गरेको ठहर गर्दै दोषी मानिएको हो।
जनता र कानुन व्यवसायीको प्रतिक्रिया अदालतको यो फैसलापछि पाकिस्तानमा सार्वजनिक बहस चर्किएको छ। लाहोर र पेशावरका बासिन्दा तथा पत्रकारहरूले न्यायिक प्रक्रियाको विश्वसनीयतामाथि प्रश्न उठाएका छन्। कानुन व्यवसायीहरूले संवैधानिक सर्वोच्चता र विधिको शासन जोगाउन अग्रणी भूमिका खेल्नुपर्नेमा खानले जोड दिएका छन्। न्यायबिना देशको आर्थिक प्रगति सम्भव नहुने उनको ठम्याई छ।
