काठमाडौं । नेपाली कांग्रेसको संसदीय दलको उम्मेदवारका मतदान भइरहेको छ । उम्मेदवारहरु कांग्रेस सभापति शेरबहादुर देउवा र महामन्त्री गगनकुमार थापाले मतदान गरिसकेका छन् ।
निर्वाचन समितिले ८ देखि १० बजेसम्मको समय तोकेको भए पनि सभापति देउवा पक्षका सांसदहरुले कांग्रेस संसदीय दलको कार्यालय सिंहदरबारमा जारी मतदानका लागि मोबाइल लैजान पाउनु पर्ने माग गरेपछि मतदान ढिला गरी भएको हो ।
मतदान केन्द्रमा मोबाइल लैजान पाउनु पर्ने र हुँदैन भन्ने पक्षको विवाद हुँदा मतदान शुरु हुन नसकेको थियो । निर्वाचन समितिका रहेका संस्थापन पक्षधर भिष्मराज आङदेम्बे र पुष्पा भुसास मोबाइल लैजान पाउनु पर्ने पक्षमा थिए भने संस्थापनइतर पक्षका प्रकाश स्नेही भने गोप्य मतदानमा मोबाइल लैजान हुँदैन भन्ने पक्षमा थिए ।
मतदान गरेपछि नेता थापाले आफू परिवर्तनको पक्षमा रहेको बताएका छन् । त्यस्तै अर्का महामन्त्री विश्वप्रकाश शर्माले देशले परिवर्तन चाहेको उल्लेख गरेका छन् ।
कांग्रेस संसदीय दलमा ८९ सांसदले निर्वाचन प्रकृयामा भाग लिएका छन् । ४५ मत ल्याउने उम्मेदवारले जित हासिल गर्नेछन् ।
मतदान सकिएसँगै तत्कालै गणना गरी विजेता घोषित गरिने छ ।
