काठमाडौं । बिकिनी किलर भनेर चिनिने चार्लस् शोभराज आज छुट्दैछन् । सर्वोच्च अदालतको आदेशपछि नेपाल, भारत लगायत अन्य दक्षिण एसियाली मुलुकहरूमा २० बढीको हत्या आरोप खेपिरहेका चार्ल्स शोभराजलाई आज अध्यागमनमा बुझाइदै छ ।
सन् १९७५ मा टेरेसा नोल्टन नामकी पर्यटक बिकिनी लगाएको पोखरीमा मृत फेला परेकी थिइन् । यो चार्लस्को पहिलो हत्या थियो। ७० को दशकमा चार्लस्ले दक्षिण-पूर्वी एसियामा १२ पर्यटकको हत्या गरेका थिए। उनीहरूको मृत्यु पानीमा डुबेर, घाँटी थिचेर, चक्कुले वा जिउँदै जलाएर भएको थियो ।
आफ्नो आकर्षक व्यक्तित्वका कारण चार्लस्ले महिलाहरूसँग सजिलै सङ्गत गर्थे । शोभराजले थाइल्याण्ड, नेपाल र भारतका पर्यटक विशेष गरी ब्याकप्याकरलाई लक्षित गरेका थिए । उसले प्रायः उनीहरूसँग मित्रता गर्दथे र त्यसपछि उनीहरूलाई लागूपदार्थ खुवाउँथ्यो, तिनीहरूको सामान र पहिचान चोर्थ्यो। शोभराज बिकिनी किलर भनेर मिडिया र प्रहरीमा पनि चिनिन्थ्यो । उनको शिकार प्राय: बिकिनी लगाएका पर्यटक केटीहरू छुट्टीमा हुने गर्थे। उनी बिकिनी लगाएका युवतीलाई मार्ने गर्थे त्यसैले उनलाई ‘बिकिनी किलर’ नाम दिइएको हो ।
भियतनामी मूलका चार्लस् शोभराजको जन्म सन् १९४४ मा भियतनामको हो ची मिन्ह शहरमा भएको थियो। उनकी आमा भियतनामकी थिइन् र उनका बुबा भारतीय मूलका थिए। चार्लस्को वास्तविक नाम हत्चन्द भाउनानी गुरुमुख चार्लस् शोभराज हो।
चार्लस्को जीवनका केही वर्ष एसिया र फ्रान्समा बित्यो। शोभराजकी आमा भियतनामकी थिइन् र बुबा सिन्धी हिन्दुस्तानी थिए। मिडिया रिपोर्टका अनुसार चार्लस्का आमाबुवाले विवाह गरेका थिएनन्। चार्लस्की आमाले भियतनाममा तैनाथ फ्रान्सेली सेनाका लेफ्टिनेन्टलाई भेटिन्। सिपाहीले दुवैलाई ग्रहण गरे र यसरी चार्लस्ले फ्रान्सेली नागरिकता पाए।
चार्लस् सानैदेखि अपराधको संसारमा प्रवेश गरेका थिए। सन् १९६३ मा शोभराज चोरीको अपराधमा पहिलो पटक जेल परेका थिए । उनी पहिलो पटक फ्रान्सको पोइसे जेलमा गएका थिए । फ्रान्सको पोइसे जेल पेरिस शहरबाट टाढा एकान्त ठाउँमा थियो। चार्लस्ले डरलाग्दो कैदीहरू माझ कराटेको सहायताले आफ्नो रक्षा गर्थे। शोभराज यस जेलमा चुपचाप बस्ने गर्थे र इशारामा कुरा सोध्ने गर्थे । जेलबाट रिहा भएपछि चार्लस्ले पेरिसको उच्च वर्गीय समाजका मानिसहरूलाई फसाउन थाले।
चार्लस् फ्रान्सेली जेलबाट बाहिर आएका थिए तर बाहिरिएपछि पनि अपराधको दुनियाँमा सक्रिय रहे । फ्रान्समा रहँदा उनले धेरै घोटाला गरे र धेरै पैसा जम्मा गरे। त्यसपछि उनी युरोप छोडेर स्तानबुलबाट भारत आए । यसैबीच चार्लस्ले सेन्टल नामकी महिलासँग पनि विवाह गरेका थिए । विवाहपछि दुवै मिलेर पर्यटकलाई लुट्ने र राहदानीमा संसार घुम्ने गर्थे । मुम्बईमा बस्दै गर्दा चान्तलले पहिलो सन्तानलाई जन्म दिएकी हुन् । छोरी उषाको जन्मपछि चार्लस्को अपराध निकै बढ्यो । उनले जेलबाट भाग्ने कला पनि पाइसकेका थिए ।
शोभराज अपरिचित व्यक्तिलाई धोका दिने र युरोप र एसियाभरि प्रहरीलाई छल्न माहिर थिए। त्यसैले उनलाई द सर्पेंट (सर्प) पनि भनिन्छ।
सन् १९७० को दशकमा चार्लस्ले भारतमा आफ्नो पाइला राखे । चार्लस्ले चोरीका कारहरूको दलाली गर्न थाले। उनले यी कारहरू धनी भारतीयहरूलाई बेच्ने गर्थे (जसलाई विदेशी कारहरू राख्न मन पर्थ्यो)। पाकिस्तान र इरानबाट कार चोरेर सीमा नाका हुँदै भारतमा ल्याउँथे । भारतको चार्लस्ले तिहाड जेलमा १२ वर्ष बिताए । यद्यपि उनी एक पटक तिहाडबाट भाग्न सफल भए। उनीमाथि नयाँ दिल्लीमा फ्रान्सेली टुर पार्टीका २२ सदस्यलाई लागूऔषध दिएको आरोप पनि लागेको थियो । यस्तै लागूऔषध र हत्याको मुद्दामा थाइल्याण्डको प्रहरीले चार्लस्विरुद्ध पक्राउ पुर्जी जारी गरेको थियो त्यहाँ उनलाई मृत्युदण्डको सजाय हुने थियो । जसका कारण चार्लस् तिहाड जेल फर्किए । सन् १९९७ मा चार्लस् तिहाड जेलबाट रिहा भएका थिए । उनी सन् १९७६ देखि १९९७ सम्म भारतको जेलमा रहे । यसैबीच उनी सन् १९८६ मा जेलबाट पनि भागेका थिए । तर फेरि पक्राउ परेपछि सजाय पूरा गरेर फ्रान्स गए ।
त्यसपछि उनी नेपाल भ्रमणका क्रममा पक्राउ परे । सन् २००३ देखि केन्द्रीय कारागारमा छन् । उनलाई नेपालमा जन्मकैदको सजाय सुनाइएको थियो, जुन अहिले पुरा भएको छ । ७८ वर्षीय शोभराजले २०७७ पुस ७ गते कैद छुटको माग गर्दै रिट दायर गरेका थिए । जेष्ठ नागरिक ऐन अनुसार ७५ वर्ष पूरा भएकालाई ७५ प्रतिशत कैद छुट दिइने व्यवस्था छ ।
शोभराज धेरै भाषामा निपुण छन् । भेषमा माहिर र आफ्नो आकर्षक व्यक्तित्वका कारण महिलासँग सजिलै सङ्गत गर्थे। सन् २०१५ मा चार्लस्को जीवनीमा आधारित फिल्म ‘मै और चार्लस्’ रिलिज भएको थियो ।
कुनै बेला नेपाल, भारत, म्यानमार, थाइल्याण्ड, फ्रान्स, इरान, ग्रीस, टर्कीलगायत नौ देशका प्रहरी चार्लस् शोभराजलाई पर्खिरहेका थिए । तर उनले आफ्नो जीवनको अधिकांश समय चार देशमा कैदी भएर बिताए। एक पटक नख्खु कारागारबाटै शोभराजले अन्तर्वार्ता दिएका थिए । सो अन्तर्वार्ता सार्वजनिक भएपछि कारागारभित्र बसेका शोभराजले कसरी अन्तर्वार्ता दिए भन्नेबारे विश्वभर चर्चा भएको थियो । गृह मन्त्रालयले त्यति बेला कैदीले सञ्चारमाध्यमलाई अन्तर्वार्ता दिनु गैर कानुनी भएको बताएको थियो ।
