बुटवलमा जारी लिग नकआउट प्रतियोगिता: फुलबारीलाई हराउँदै बुद्धभूमि विजयी

नारायण वली,

प्रकाशित २०७९ माघ १५ आइतबार

रुपन्देही । बुटवलमा जारी रुपन्देही जिल्ला लिग नकआउट छनौट प्रतियोगिता-२०७९ को तेस्रो दिन प्रतिष्पर्धात्मक खेल सम्पन्न भएको छ । सिद्धेश्वर खेल मैदानमा जारी खेलमा शनिबार तामनगरस्थित फुलबारी गाइज र सैनामैनास्थित बुद्धभूमि युवा क्लबबीच खेल भएको हो ।

प्रतिष्पर्धात्मक खेलमा फुलबारी गाईजलाई हराउँदै बुद्धभूमि विजयी भएको छ । रुपन्देही जिल्ला फुटबल संघको आयोजनामा शनिबार भएको खेलमा तामनगरको फुलबारी गाईजलाई १–० गोल अन्तरले पराजित गर्दै बुद्धभूमि युवा क्लबले जित निकालेको हो । कडा प्रतिष्पर्धात्मक खेलको ४८ औं मिनेटमा बुद्धभूमिका साजन परियारले आकर्षक गोल गर्दै जित निकालेका थिए ।

खेलमा पहिलो हाफ गोलरहित बराबरी रहेको थियो । प्रतियोगिताको अन्तिममा पुग्ने दुई टिम जिल्ला लिगका लागि छनोट हुने बताइएको छ । खेलमा १६ क्लबहरुले भाग लिएका छन् ।