अष्ट्रेलियाले अमेरिकाबाट पाँच वटा आणविक पनडुब्बी किन्दै
हाम्रा कुरा
प्रकाशित २०७९ फागुन २५ बिहिबार
840
Shares
काठमाडौं। चार अमेरिकी अधिकारीहरूका अनुसार अष्ट्रेलियाले संयुक्त राज्य अमेरिका र युनाइटेड किंगडमसँग ऐतिहासिक प्यासिफिक सुरक्षा सम्झौताको एक हिस्साका रूपमा २०३० को दशकमा पाँचवटा अमेरिकी भर्जिनिया क्लासको आणविक शक्तिबाट चल्ने पनडुब्बीहरू किन्ने घोषणा गर्ने अपेक्षा गरिएको छ।
तथाकथित अकुस (एयुकेयुएस) सम्झौता अन्तर्गत कम्तिमा एक अमेरिकी पनडुब्बीले आगामी वर्षहरूमा अष्ट्रेलियाका बन्दरगाहहरूको भ्रमण गर्नेछ र सन् २०३० को दशकको अन्त्यसम्ममा नयाँ वर्गको पनडुब्बीहरू बेलायतको डिजाइन र अमेरिकी प्रविधिमा निर्माण गरिने एक अधिकारीले उद्धृत गर्दै रोयटर्सले लेखेको छ।
अष्ट्रेलियाका प्रधानमन्त्री एन्थोनी अल्बानीजले सोमबार अमेरिकी राष्ट्रपति जो बाइडेन र बेलायतका प्रधानमन्त्री ऋषि सुनकलाई अकुसको आगामी कदमबारे छलफल गर्न सान डिएगोमा भेट्ने भएका छन्।
प्यासिफिक सुरक्षा सम्झौता पहिलो पटक सेप्टेम्बर २०२१ मा घोषणा गरिएको थियो र यसमा हाइपरसोनिक मिसाइल, कृत्रिम बुद्धिमत्ता र साइबर युद्धमा सहकार्य समावेश हुने अपेक्षा गरिएको छ। यस क्षेत्रमा चीनको बढ्दो शक्ति र आक्रामक स्थितिको प्रतिरोध गर्ने प्रयासको रूपमा यसलाई हेरिएको छ भने, बेइजिङले यसको निन्दा गरेको छ।
