काठमाडौँ । भारतमा आयोजना हुने आईसीसी एक दिवसीय विश्वकप छनोट क्रिकेट प्रतियोगिता आजबाट जिम्बाब्वेमा शुरु भएको छ । पहिलो खेलमा नेपालले आयोजक जिम्बाब्वेसँग खेलिरहेको छ ।
हरारे स्पोर्टस् क्लबमा जारी खेलमा नेपालले पहिलो पटक टेष्ट मान्यता प्राप्त राष्ट्रसँग एक दिवसीय विश्वकप छनोटमा खेलिरहेको हो । यो नेपालको टेष्ट राष्ट्रसँग पहिलो एक दिवसीय अन्तर्राष्ट्रिय मान्यताप्राप्त खेल पनि हो ।
नेपालले टस हारेर पहिले ब्याटिङ थालेको छ । रोहित पौडेलको कप्तानीमा रहेको नेपाली टिममा सन्दीप लामिछाने, कुशल भुर्तेल, भीम शार्की, कुशल मल्ल, आरिफ शेख, दिपेन्द्रसिंह ऐरी, सोमपाल कामी, करण केसी, आसिफ शेख र गुल्सन झा रहेका छन् ।
रोहित जारी विश्वकप छनोटका सबैभन्दा कम उमेरका कप्तान हुन् ।
नेपाल र जिम्बाब्वेले हालसम्म एक मात्र ५० ओभरको खेल खेलेको छ । सन् २०१८ को ४ मार्चमा जिम्बाब्वेमा नै आयोजना भएको विश्वकप छनोट खेलमा नेपाल र जिम्बावेबीच खेल भएको थियो ।
त्यो बेला नेपालसँग एक दिवसीय मान्यता थिएन । उक्त खेल लिस्ट ए मान्यताको भएको थियो । सो खेलमा नेपाल ११६ रनले पराजित भएको थियो ।
समूह ए मा रहेको नेपालको अर्को खेलमा अमेरिका र वेष्ट इन्डिज भिडिरहेका छन् । खेलमा वेष्ट इन्डिजले पहिले ब्याटिङ गरिरहेको छ ।
