काठमाडौँ । सरकारले सार्वजनिक यातायातको भाडा बढाएको छ । इन्धनको मूल्यवृद्धि भएको २४ घण्टा नपुग्दै सरकारले सार्वजनिक यातायातको भाडा बढाएको हो ।
मंगलबार मध्यरातिदेखि लागू हुनेगरी नेपाल आयल निगमले पेट्रोलमा प्रतिलिटर पाँच रुपैयाँ र डिजेल र मट्टीतेलमा १४ रुपैयाँ बढाएको थियो ।
इन्धनको मूल्य बढेसँगै बुधबार दिउँसो यातायात व्यवस्था विभागले सार्वजनिक यातायातको भाडा पनि बढाएको हो । विभागले यात्रुवाहक र मालवाहक सवारीको भाडा पनि वृद्धि गरेको हो ।
नयाँ भाडादर अनुसार यात्रुवाहक सवारी साधनको ४.७० प्रतिशत, पहाडी बाटोमा सञ्चालन हुने मालवाहक सवारीको ६.१५ प्रतिशत र तराईमा चल्ने मालवाहक सवारीको ६.८३ भाडा प्रतिशतले बढेको छ ।
अनुगमनमा कमजोर
सवारीसँगै पेट्रोलियम पदार्थको भाडा घट्दा भने यातायातले भाडा घटाउँदैनन् । त्यसैगरी एलपीजी ग्यासमा घटेको भाउमा पनि उपभोक्ताले ग्यास पाउँदैनन् ।
एकैपटक १३० रुपैयाँ ग्यासको भाउ घट्दा नयाँ सिलिन्डर अझै आएको छैन भन्दै उपभोक्तालाई पुरानै भाउमा बेचेका थिए ।
त्यसैगरी नै सवारी साधनमा पनि भाउ घट्दा हामीलाई जानकारी छैन भन्दै कन्डक्टरले कहिल्यै भाउ नघटाउने गरेको यात्रुहरुको गुनासो रहँदै आएको छ ।
