ललितपुर। ललितपुरको पाटनमा एक हजार चार सय वर्ष पुरानो इतिहास बोकेको ऐतिहासिक न्यकू जात्रा सोमबार सकिएको छ । गाईजात्रा सुरु भएको भोलि पल्टदेखि सुरु हुने न्यकू जात्रा सोमबार सकिएको हो ।
निधन भएपछि परलोकमा गएका आफन्तहरूको आत्माले शान्ति पाओस् भनी कामना गर्दै विश्वासको साथ मनाइने न्यकू जात्रा पाटन क्षेत्रको दश वटा टोलमध्ये प्रत्येक वर्ष एउटा टोलमा जात्राको आयोजना गर्ने गरिन्छ । प्रतिवर्ष एउटा टोलले जात्राको आयोजना गर्ने भएकाले एउटा टोलको पालो १० वर्षमा एक पटक आउने गर्छ ।
ललितपुर महानगरपालिका–६ को न्यकू जात्रा मतया व्यवस्था समिति सौगल टोलले १० वर्षपछि न्यकू जात्रा मनाएको सोमबार अन्तिम दिन हो । न्यकू जात्रा मतया व्यवस्था समितिले सोमबार विशेष पूजासोमबारा गरी अर्को वर्षका लागि नकुबहिल टोललाई हस्तान्तरण गरेको छ ।
न्यकू मतया जात्रालाई बत्तीको जात्रा पनि भनिन्छ । विशेषगरी न्यकू जात्रामा हर्न सिङ नेकु बाजा, दमोखी बाजा र धा बाजा गरी जम्मा १७ भन्दा बढी बाजा बजाइने न्यकू मतया जात्रा आयोजक समितिको अर्थ विभाग संयोजक रवीन्द्र प्रधानले जानकारी दिए । उनले भने, “जात्रा एक हप्तासम्म चले पनि थरिथरिका बाजा बजाउनका लागि हामीले एक वर्षदेखि नै अभ्यास गर्नुपर्ने हुन्छ ।”
न्यकू जात्रा मतया जात्रा सुरु भएपछि स्थानीयवासीले ललितपुरमा रहेका चार वटा अशोक स्तूपमा गएर पूजासोमबारा गर्ने चलन छ । स्तूपमा मात्र नभएर स्तूपभित्र रहेका विभिन्न मन्दिरमा देशको सबै नागरिकको सुखशान्तिसहित परलोकमा रहेका आफन्तको आत्माको लागि समेत पूजा गर्ने चलन छ ।
सोमबार जात्राको अन्तिम दिन भएका कारण गणेशको पूजासहित विभिन्न प्रकारका खानेकुरा चढाएर एक विशेष कार्यक्रमका साथ जात्रालाई अर्को वर्षका लागि अर्को टोललाई हस्तान्तरण गरेपछि यो वर्षको जात्रा सकिएको छ ।
