काठमाडौँ । भारतमा जारी विश्वकप एक दिवसीय क्रिकेटमा भारतले अष्ट्रेलियामाथि शानदार ६ विकेटको जित हासिल गरेको छ ।
चेन्नईको एम चिदम्बरम क्रिकेट मैदानमा जितका लागि दुई सयरनको सामान्य चुनौती पछ्याएको भारतले ४१.२ ओभरमै ४ विकेटको क्षतिमा पूरा गरेको हो ।
शुरुआतमा २ रन जोड्दा ३ विकेट गुमाएको भारत अप्ठेरोमा भए पनि केएल राहुल र विराट कोहलीबीच चौथो विकेटका लागि भएको १६४ रनको साझेदारीले भारतले सहज जित हासिल गरेको हो ।
राहुलले ११५ बलमा अविजित रहँदै ९७ रन जोडे । त्यस्तै कोहलीले ११६ बलमा ८५ रन बनाए । त्यस्तै हार्दिक पाण्डेयाले ८ बलमा अविजित रहँदै ११ रन जोडे ।
कप्तान रोहित शर्मा, इशान किशन र श्रेयस ऐयर भने रन नबनाइ आउट भए । जोश हाज्लेवुडले ३ विकेट लिए ।
यसअघि खेलमा टस जितेर अष्ट्रेलियाले पहिले ब्याटिङ गर्दै ३ बल खेल्न बाँकी छँदै अलआउट भएर १९९ रनमात्र बनाउन सक्यो ।
स्टेभेन स्मिथले ४६ तथा डेभिड वार्नरले ४१ रन बनाएको इनिङ्सलाई सस्तैमा समेट्ने क्रममा भारतीय स्पिनरहरु हावी भए ।
रविन्द्र जडेजाले ३ तथा जसप्रित बुमराह र कुलदीप यादवले समान २ विकेट लिए । त्यस्तै मोहम्मद सिराज, हार्दिक पाण्डेया र रविचन्द्रन आश्विनले १–१ विकेट लिए ।
हेड टु हेड
अहिलेसम्म दुवैले आपसमा १५० एक दिवसीय खेलेका छन् । जसमा अष्ट्रेलिया ८३ तथा भारत ५७ खेलमा विजयी भएको छ । १० खेल नतिजाविहीन रह्यो ।
विश्वकपमा पनि यी दुईले १३ खेल खेलेका छन् । जसमा ८ मा अष्ट्रेलिया विजयी भएको छ भने भारतले ५ खेलमात्र जितेको छ ।
सन् २०१९ को विश्वकपमा भने भारतले हराएको थियो । र यसपालि पनि भारतले नै हरायो ।
यो स्टेडियममा अहिलेसम्म ३२ एक दिवसीय खेलिएको छ । रोचक कुरा त के भने पहिले ब्याटिङ गर्ने टिमको जितको प्रतिशत ४९–५१ रहेको छ । आज पनि त्यही भयो ।
अहिलेसम्मको खेलको नतिजा
विश्वकपको पहिलो खेलमा न्यूजिल्याण्डले साविक विजेता इङ्गल्याण्डलाई ९ विकेटले हराएको थियो ।
दोस्रो खेलमा पाकिस्तानले नेदरल्याण्ड्सलाई ८१ रनले हराएको थियो ।
विश्वकपको तेस्रो खेलमा बंगलादेशले अफगानिस्तानलाई ६ विकेटले हरायो ।
विश्वकपको चौथो खेलमा दक्षिण अफ्रिकाले श्रीलंकालाई १०२ रनले हराएको थियो ।
अक्टोबर ५ तारिख (असोज १८ गते) देखि शुरु भएको डेढ महिनासम्म चल्ने विश्वकपमा १० टिम सहभागी रहेका छन् । एक आपसमा खेलेपछि अंक तालिकाको शीर्ष चारमा रहने टिम सेमिफाइनलमा पुग्ने छन् ।
अंक तालिका
सबै टिमले एक एक खेल खेलिसक्दा २ अंकसहित न्यूजिल्याण्ड, दक्षिण अफ्रिका, पाकिस्तान, बंगलादेश र भारत क्रमशः पहिलोदेखि पाँचौँ स्थानमा छन् ।
अष्ट्रेलिया, अफगानिस्तान, नेदरल्याण्ड्स, श्रीलंका र इङ्गल्याण्डले खाता खोलेका छैनन् ।
