काठमाडौँ । भारतमा जारी विश्वकप एक दिवसीय क्रिकेटको १७ औँ खेलमा अहिले भारत र बंगलादेश भिडिरहेका छन् । टस जितेर बंगलादेशले पहिले ब्याटिङ गर्दैछ ।
पुनेको महाराष्ट्र क्रिकेट एसोसिएसन स्टेडियममा जित हासिल गर्दै भारत शीर्ष स्थानमा पुग्न चाहन्छ । बंगलादेशले सेमिफाइनलको सम्भावना कायमै राख्न जित हासिल गर्न चाहन्छ ।
भारतीय कप्तान रोहित शर्माले यो खेलमा पनि शतक लगाए विश्वकपमा बंगलादेशविरुद्ध लगातार तेस्रो शतक बनाउने कीर्तिमान रच्नेछन् ।
यसअघि सन् २०१५ मा अष्ट्रेलियामा १३७ तथा सन् २०१९ मा इङ्गल्याण्डमा १०४ रन बंगलादेशविरुद्ध बनाएका थिए ।
विश्वकपको हेड टु हेडमा अहिलेसम्म चार खेल खेलेकामा भारतले ३ तथा बंगलादेशले १ खेल जितेको छ ।
एक दिवसीयमा अहिलेसम्म ४० खेल भएकामा भारतले ३१ तथा बंगलादेशले ८ जित हासिल गरेको छ । एक खेल अनिर्णित बनेको थियो ।
यो विश्वकपमा रोहितले २१७ रन बनाएका छन् । जसमा १ शतक र १ अर्धशतक रहेको छ । जसप्रित बुमराहले ८ विकेट लिइसकेका छन् ।
बंगलादेशका कुशफिकुर रहिमले ११९ रन बनाएका छन् भने शकिब अल हसनले ५ विकेट लिएका छन् । तर उनी घाइते भएका कारण यो खेलमा खेलेका छैनन् । निजामुल हुसेन शान्टोले कप्तानी गरेका छन् ।
अहिलेसम्मको खेलको नतिजा
–पहिलो खेलमा न्यूजिल्याण्डले साविक विजेता इङ्गल्याण्डलाई ९ विकेटले हरायो ।
–दोस्रो खेलमा पाकिस्तानले नेदरल्याण्ड्सलाई ८१ रनले हरायो ।
–तेस्रो खेलमा बंगलादेशले अफगानिस्तानलाई ६ विकेटले हरायो ।
–चौथो खेलमा दक्षिण अफ्रिकाले श्रीलंकालाई १०२ रनले हरायो । यो खेलमा दक्षिण अफ्रिकाले अहिलेसम्मकै विश्वकपकै सर्वाधिक ४२८ रन बनायो भने तीन खेलाडीले एकै इनिङ्समा शतक बनाएर रेकर्ड राखे ।
– पाँचौँ खेलमा भारतले अष्ट्रेलियालाई ६ विकेटले हरायो ।
–छैटौँ खेलमा न्यूजिल्याण्डले नेदरल्याण्ड्सलाई ९९ रनले हरायो ।
–सातौँ खेलमा इङ्गल्याण्डले बंगलादेशलाई १३७ रनले हरायो ।
–आठौँ खेलमा पाकिस्तानले श्रीलंकालाई ६ विकेटले हरायो । विश्वकपको इतिहासमा सबैभन्दा बढी ३४५ रनको चुनौती पछ्याएर जित्ने कीर्तिमान पाकिस्तानले राख्यो ।
–नवौँ खेलमा भारतले अफगानिस्तानलाई ८ विकेटले हरायो । रोहित शर्माले विश्वकपमा कीर्तिमानी सातौँ शतक बनाए ।
–दशौँ खेलमा दक्षिण अफ्रिकासँग पाँच पटकको च्याम्पियन अष्ट्रेलिया १३४ रनले पराजित भयो । सन् १९८३ मा भारतसँग ११८ रनको हारपछि पहिलो पटक अष्ट्रेलिया यति फराकिलो अन्तरले पराजित भएको हो ।
–११ औँ खेलमा न्यूजिल्याण्ड विजयी भएको छ । न्यूजिल्याण्डले बंगलादेशलाई ८ विकेटले हरायो ।
–१२ औँ खेलमा भारतले पाकिस्तानलाई सहजै ७ विकेटले हरायो । १९२ रनको चुनौती भारतले ३०.३ ओभरमै ३ विकेटको क्षतिमा पूरा गर्यो । भारत अहिलेसम्म विश्वकपमा पाकिस्तानसँग पराजित भएको छैन । यो लगातार आठौँ जित हो ।
–१३ औँ खेलमा अफगानिस्तानले साविक विजेता इङ्गल्याण्डमाथि अप्रत्याशित ६९ रनको जित हासिल गर्यो । अफगानिस्तानले पहिलो पटक कुनै पनि फर्मेटको खेलमा इङ्गल्याण्डलाई हराएको हो ।
–१४ औँ खेलमा अष्ट्रेलियाले श्रीलंकालाई ५ विकेटले हराउँदै अंकको खाता खोल्यो ।
–१५ औँ खेलमा दक्षिण अफ्रिका पराजित भयो । दक्षिण अफ्रिका एसोसिएट राष्ट्र नेदरल्याण्ड्ससँग ३८ रनले पराजित भएको हो ।
–१६ औँ खेलमा न्यूजिल्याण्डले अफगानिस्तानमाथि १४९ रनको फराकिलो जित हासिल गर्यो ।
अक्टोबर ५ तारिख (असोज १८ गते) देखि शुरु भएको डेढ महिनासम्म चल्ने विश्वकपमा १० टिम सहभागी रहेका छन् । एक आपसमा खेलेपछि अंक तालिकाको शीर्ष चारमा रहने टिम सेमिफाइनलमा पुग्ने छन् ।
अंक तालिका
४ खेलबाट ८ अंकसहित न्यूजिल्याण्ड शीर्ष स्थानमा रहेको छ । ३ खेलबाट ६ अंकसहित भारत दोस्रो स्थानमा रहेको छ । ३ खेलबाट ४ अंकसहित दक्षिण अफ्रिका तेस्रो स्थानमा रहेको छ । पाकिस्तान ३ खेलबाट ४ अंकसहित चौथो स्थानमा रहेको छ ।
३ खेलबाट २ अंकसहित इङ्गल्याण्ड पाँचौँ तथा ३ खेलबाट २ अंकसहित बंगलादेश छैटौँ स्थानमा रहेको छ ।
३ खेलबाट २ अंकसहित अष्ट्रेलिया सातौँ स्थानमा छ । ३ खेलबाट २ अंकसहित नेदरल्याण्ड्स आठौँ स्थानमा छ । ४ खेलबाट २ अंकसहित अफगानिस्तान नवौैँ स्थानमा छ । पुछारको श्रीलंका अंकविहीन छ ।
