अष्ट्रेलिया र दक्षिण अफ्रिका मैदानमा, दक्षिण अफ्रिका पहिले ब्याटिङमा

हाम्रा कुरा

प्रकाशित २०८० कार्तिक ३० बिहिबार

काठमाडौँ । भारतमा जारी एक दिवसीय विश्वकप क्रिकेटको दोस्रो सेमिफाइनलमा अहिले अष्ट्रेलिया र दक्षिण अफ्रिका खेल्दैछन् ।

इडेन गार्डेनमा हुँदै गरेको खेलमा टस जितेर दक्षिण अफ्रिकाले पहिले ब्याटिङ रोजेको छ ।

दक्षिण अफ्रिका लिग चरणको दोस्रो तथा अष्ट्रेलिया तेस्रो भएर सेमिफाइनलमा पुगेको हो ।

अष्ट्रेलिया पाँच पटकको विश्वकप विजेता हो भने दक्षिण अफ्रिकाले अहिलेसम्म उपाधि जित्न सकेको छैन ।

हेड टु हेड
दक्षिण अफ्रिका र अष्ट्रेलियाबीचको एक दिवसीय क्रिकेट निकै नै रोमाञ्चक हुने गर्दछ । अहिलेसम्म दुवैले आपसमा १०९ खेल खेलेका छन् ।

जसमा अष्ट्रेलियाले ५० खेल जितेको छ भने दक्षिण अफ्रिकाले ५५ खेल जितेको छ । ३ खेलमा टाइ भएको छ भने एक खेल नतिजाविहीन भएको छ । त्यस्तै तटस्थ भेन्युमा अष्ट्रेलियाले ९ तथा दक्षिण अफ्रिकाले ८ खेल जितेको छ ।

विश्वकपमा दुवैले आपसमा ७ खेल खेलिसकेका छन् । जसमा दुवैले समान ३ पटक खेल जितेका छन् । एक खेल टाइ भएको थियो ।

यो अर्थमा पनि भारतीय भूमिमा दुवैबीच कडा टक्कर हुने अनुमान गरिएको छ । तर जारी विश्वकपमा भने दक्षिण अफ्रिका हावी भएको छ ।

लिग चरणमा दक्षिण अफ्रिकासँग पाँच पटकको च्याम्पियन अष्ट्रेलिया १३४ रनले पराजित भयो । सन् १९८३ मा भारतसँग ११८ रनको हारपछि पहिलो पटक अष्ट्रेलिया यति फराकिलो अन्तरले पराजित भएको हो ।

विजेताले फाइनलमा भारतसँग खेल्नेछ । भारतले बुधबार भएको पहिलो सेमिफाइनलमा न्यूजिल्याण्डलाई ७० रनले पराजित गर्यो ।

फाइनल खेल आगामी आइतबार अहमदाबादमा दिउँसो २ः१५ बजे शुरु हुनेछ ।