काठमाडौँ । भारतमा जारी एक दिवसीय विश्वकप क्रिकेटको उपाधि भिडन्त अहिले भइरहेको छ । भारत र अष्ट्रेलिया अहमदाबादस्थित विश्वकै सबैभन्दा ठूलो क्रिकेट स्टेडियम नरेन्द्र मोदी स्टेडियममा रहेका छन् ।
खेलमा टस हारेर भारतले पहिले ब्याटिङ गरिरहेको छ । भारतले २८.३ ओभरमा चौथो विकेट गुमाएको छ । चौथो विकेटका रुपमा कीर्तिमानी ब्याट्सम्यान विराट कोहली आउट भएका छन् ।
उनी ६३ बलमा ५४ रन बनाएर आउट भए । चौथो विकेटका लागि कोहली र केएल राहुलबीच ६७ रनको साझेदारी भएको थियो । कोहलीले एकै संस्करणमा नौ पटक ५० भन्दा बढी रन बनाएर कीर्तिमान रचेका छन् । अहिलेसम्म यो सफलता विश्वकपमा कसैले हासिल गरेका छैनन् ।
त्यस्तै उनले विश्वकपको एकै संस्करणमा अहिलेसम्मकै सबैभन्दा बढी रन बनाएका छन् । उनले ७६५ रन बनाएका छन् ।
उनले सन् २००३ को विश्वकपमा भारतीय खेलाडी सचिन तेन्दुलकरले बनाएको कीर्तिमान तोडेका हुन् । सचिनले ६७३ रन बनाएका थिए ।
त्यस्तै सेमिफाइनलमा न्यूजिल्याण्डविरुद्ध शतक बनाउँदै कोहलीले एक दिवसीयमा शतकको संख्या ५० पुर्याउँदै सचिन तेन्दुलकरको कीर्तिमान पनि तोडेका छन् ।
यसअघि भारतले १०.२ ओभरमा ३ विकेट गुमाएर ८१ रन बनाएको थियो । श्रेयस अय्यर मात्र ३ बल खेल्दै ४ रन बनाएर आउट भएका थिए ।
त्यसअघि ९.४ ओभरमा ७६ रन बनाउँदा सबैभन्दा ठूलो विकेटका रुपमा कप्तान रोहित शर्मालाई गुमाएको थियो । रोहित ३१ बलमा ३ छक्का र ४ चौकाको मद्धतले ४७ रन बनाएर आउट भएका थिए । रोहितलाई ग्लेन म्याक्सवेलले आउट गरेका हुन् । सेमिफाइनलमा पनि रोहित ४७ रनमै आउट भएका थिए ।
यसअघि ४.२ ओभरमा ३० रन जोड्दा पहिलो विकेट गुमाएको थियो । शुबमन गिल ७ बलमा ४ रन बनाएर आउट भएका थिए ।
विश्वकपको एउटा रोचक प्रसङ्ग पनि छ कि पछिल्ला तीन विश्वकपको उपाधि आयोजकले नै जितेको छ । सन् २०११ को विश्वकप भारतले, सन् २०१५ को विश्वकप अष्ट्रेलियाले र सन् २०१९ को विश्वकप इङ्गल्याण्डले जितेको थियो ।
सो अर्थमा यसपालिको विश्वकप पनि भारतले नै जित्ने विश्वासमा भारतीयहरु रहेका छन् ।
तर यो मैदानमा जारी विश्वकपका चार खेल भएका छन् । जसमा ३ खेलमा रन पछ्याउने टिमले जित हासिल गरेको छ । तर रोहितको दृढ विश्वास त्यही छ कि विगत हैन आजले जित्ने हो ।
जारी विश्वकपमा रोहितले ६ पटक टस जितेका छन् । जसमा ३ पटक ब्याटिङ र ३ पटक बलिङ रोजेका थिए । तर सबै खेलमा भारत जितेको थियो । भारतले अहिलेसम्म जारी विश्वकपका सबै १० खेल जितेको छ । चाहे भारतले टस हारोस् वा जितोस् ।
दुवै टिममा खेलाडीहरु परिवर्तन भएका छैनन् । सेमिफाइनलमा खेलेका खेलाडीहरु नै फाइनलमा रहेका हुन् ।
अष्ट्रेलिया दोहोरो ह्याट्रिक र भारत पहिलो ह्याट्रिक गर्ने लक्ष्यसहित मैदानमा उत्रिएको छ । अष्ट्रेलिया पाँच पटकको तथा भारत दुई पटकको च्याम्पियन हो ।
सेमिफाइनलमा भारतले न्यूजिल्याण्डलाई ७० रनले तथा अष्ट्रेलियाले दक्षिण अफ्रिकालाई ३ विकेटले हराएको थियो ।
लिग चरणको खेलमा भारतले अष्ट्रेलियामाथि ६ विकेटको जित हासिल गरेको थियो । दुवै टिमको त्यो जारी विश्वकपको पहिलो खेल थियो ।
पछिल्ला पाँच खेलको नतिजालाई हेर्ने हो भने दुवैले सबै खेल जितेका छन् । भारत लिग चरणका सबै खेल जितेर सेमिफाइनलमा पुगेको थियो भने अष्ट्रेलिया सात खेल जितेर सेमिफाइनलमा पुगेको थियो ।
भारत र अष्ट्रेलियाका खेलाडीमध्ये एक जो कोही पनि जुनसुकै बेला फर्ममा आउन सक्ने भएकाले पनि खेल निकै प्रतिस्पर्धात्मक हुने अपेक्षा गरिएको छ ।
हेड टु हेड
विश्वकपमा भारत चौथो पटक र अष्ट्रेलिया आठौँ पटक फाइनलमा पुगेको छ । यी दुई टिमबीच उपाधिका लागि २० वर्षपछि भिडन्त हुन लागेको हो ।
सन् २००३ मा भएको फाइनलमा अष्ट्रेलियाले भारतलाई १२५ रनले हराएको थियो । अष्ट्रेलियाले पछिल्लो २७ वर्षको रेकर्ड हेर्ने हो भने फाइनलमा पराजित भएको छैन । अष्ट्रेलियाले फाइनलमा पछिल्लो पटक सन् १९९६ मा श्रीलंकासँग हारेको थियो ।
भारतले सन् १९८३ पछि सन् २०११ मा विश्वकप जितेको थियो । त्यसपछि अघिपछि उसलाई सफलता मिलेको छैन ।
यसपालि घरेलु मैदानमै भएकाले पनि भारत हाबी देखिएको छ । विश्वकपको हेड टु हेडमा दुवैले अहिलेसम्म १३ खेल खेलेका छन् । जसमा भारत ५ तथा अष्ट्रेलिया ८ पटक विजयी भएको छ ।
पछिल्लो खेल अर्थात् लिग चरणमा भारत विजयी भएको थियो । दुवैले आपसमा १५० एक दिवसीय खेलेका छन् । जसमा भातरले ५७ तथा अष्ट्रेलियाले ८३ खेल जितेको छ । १० खेल नतिजाविहीन भएको थियो ।
पहिलो पटक विश्वकपमा सात उपाधि विजेता आमने सामने
एक दिवसीय विश्वकप क्रिकेटको इतिहासमा पहिलो पटक सात उपाधि जितेकाहरु आठौँ उपाधिका लागि आमने सामने भइरहेका छन् । अष्ट्रेलिया पाँच पटकको र भारत दुई पटकको विजेता हो ।
अहमदाबादको नरेन्द्र मोदी स्टेडियममा उपाधिका लागि भारत र अष्ट्रेलिया भिडिरहेका हुन् । पहिलो पटक एक लाख ३२ हजार दर्शकले प्रत्यक्ष रंगशालामा उपस्थित भएर फाइनल हेरिरहेका छन् । यसअघि यो कहिल्यै भएको थिएन ।
अहिलेसम्म चार उपाधि विजेतालेमात्र फाइनलमा उपाधि भिडन्त गरेका थिए । यसअघि सन् २००७ मा अष्ट्रेलिया र श्रीलंकाबीच फाइनल भिडन्त भएको थियो । त्यतिबेला अष्ट्रेलिया ३ तथा श्रीलंका एक पटकको विजेता थियो ।
सन् २०१५ मा पनि चार उपाधि विजेता फाइनलमा भिडेका थिए । त्यतिबेला अष्ट्रेलियामात्र चार उपाधि विजेता थियो भने न्यूजिल्याण्डले अहिलेसम्म उपाधि जितेको छैन ।
पछिल्लो विश्वकपमा भने पहिलो पटक उपाधि विजेताविहीनहरुले फाइनल खेले थिए । जसमा न्यूजिल्याण्डमाथि इङ्गल्याण्डले बाजी मारेको थियो ।
सन् १९८७ र सन् १९९२ को फाइनलमा पनि यस्तै भएको थियो । जहाँ १९८७ मा अष्ट्रेलिया र इङ्गल्याण्ड तथा सन् १९९२ मा पाकिस्तान र इङ्गल्याण्ड फाइनलमा भिडेका थिए । दुवै संस्करणका फाइनलिष्टहरु उपाधिविहीन थिए ।
विश्वकपमा अहिलेसम्म अष्ट्रेलियाले ५, भारत र वेष्ट इन्डिजले २–२ तथा पाकिस्तान, श्रीलंका र इङ्गल्याण्डले १–१ पटक उपाधि जितेका छन् ।
विश्वकपमा रेकर्डधारी रोहित शर्मा
काठमाडौँ । भारतीय क्रिकेट कप्तान रोहित शर्मा (उपनाम – हिटम्यान) ले विश्वकप एक दिवसीय क्रिकेटमा थुप्रै कीर्तिमान आफ्नो नाममा लेखाएका छन् ।
रोहितले विश्वकपको एकै सिजनमा सबैभन्दा बढी छक्का प्रहार गर्ने कीर्तिमान आफ्नो नाममा लेखाएका छन् । अष्ट्रेलियाविरुद्धको फाइनलमा ३ छक्का प्रहार गरेसँगै रोहितले विश्वकपमा ३१ छक्काको रेकर्ड बनाएका छन् ।
उनले वेष्ट इन्डिजका खेलाडी क्रिस गेलको कीर्तिमान तोडेका हुन् । गेलले सन् २०१५ को विश्वकपमा २६ छक्काको कीर्तिमान बनाएका थिए । रोहितले विश्वकपमा मात्रै ५४ छक्का हानिसकेका छन् । रोहितले कूल छक्कामा पनि गेलको कीर्तिमान तोडेका हुन् । गेलले ४९ छक्का बनाएका थिए ।
रोहितले २०१५, २०१९ र २०२३ को विश्वकपमात्र खेलेका छन् । रोहित पावर प्लेमा सबैभन्दा बढी छक्का हान्ने खेलाडी पनि बनेका छन् । उनले पावर प्लेमा २२ छक्का हानेका छन् । उनले न्यूजिल्याण्डका कप्तान ब्रेन्डन म्याकमुलमको १७ छक्काको कीर्तिमान तोडेका हुन् ।
रोहित कप्तानको रुपमा विश्वकपको एकै संस्करणमा सबैभन्दा बढी ५९७ रन बनाउने पहिलो भारतीय खेलाडी बनेका छन् । अहिलेसम्म कुनै पनि कप्तानले एकै संस्करणमा यति धेरै रन बनाएका थिएनन् ।
रोहितको नाममा विश्वकपमा सात शतकको कीर्तिमान रहेको छ । उनले सात शतक प्रहार गरेका छन् । त्यस्तै ६ अर्धशतक बनाएका छन् । उनी लगातार दोस्रो पटक विश्वकपमा पाँच सय भन्दा बढी रन बनाउने पहिलो खेलाडी हुन् ।
उनले सन् २०१९ मा ६४८ रन बनाएका थिए । त्यस्तै एकै संस्करणमा पाँच शतक बनाउने उनी पहिलो खेलाडी हुन् । उनले सन् २०१९ मा यो कीर्तिमान बनाएका थिए ।
