मुगु । जिल्लाको पूर्वी मुगुम कार्मारोङ गाउँपालिका वडा नं ३ चेजाङ्पुकमा बौद्ध शिक्षा पढाइ हुने भएको छ । मुगु जिल्लामा हालसम्म सरकारी निकाय, स्थानीय तहबाट बौद्ध शिक्षाको पढाइको लागि कुनै पहल नभएपछि निजी लगानीमा आधारभूत तहसम्मको बौद्ध शिक्षा पढाइ हुने भएको हो ।
बौद्ध शिक्षा पढ्नको लागि मुगुम कार्मारोङ्का लामा समुदायका बालबालिकाहरू बर्सेनि ५० देखि एक सय जनासम्म काठमाडौँ र भारत जाने गर्दछन् ।
रिम्बोचे हिस्से साम्फो र उनकी पत्नी रिम्बोच्चे खाण्डो पेमा छोइडेलको आर्थिक सहयोगमा गुम्बा निर्माण भएको र यही ओर्गेन डोढुल लिङ गुम्बामा पूजाआजा र बौद्ध शिक्षा पढाइ हुने गुम्बाका अध्यक्ष खेम्बो कार्मा राप्केले बताए ।
नयाँ गुम्बाको निर्माण कार्य पूरा भएपछि छोङ्ढुप पूजाको कार्यक्रममा विधिवत रूपमा गुम्बा उद्घाटन गरिएको छ । नव निर्मित गुम्बाको लागत भने गोप्य राखिएको छ ।
जिल्ला बाहिर गएर बौद्ध शिक्षा लिनुपर्ने बाध्यात्मक अवस्था भए पनि अबदेखि आफ्नै ठाउँमा बौद्ध शिक्षा शुरू हुने भएपछि स्थानीय लामा समुदायका मानिसहरू खुशी भएका छन् ।
अब हाम्रो बालबालिकाहरू हाम्रै ठाउँबाट बौद्ध पढाइ हुने भएकोमा हामी खुशी छौँ । अब काठमाडौँ, भारत जानु पर्ने बाध्यता छैन । वडा नं ४ कार्तिक गाउँका दाक्पा तामाङले बताए ।
अब हामीहरूको लागि धेरै सहज भयो देवता, लामाको पूजा, आजा, र प्राथाना गर्नसमेत सहज भएको तामाङले बताए ।
