कर्मचारी बर्खास्त गरेपछि गुगल प्रमुख भन्छन् – कार्यालयमा राजनीति नगर्नुस्

हाम्रा कुरा

प्रकाशित २०८१ वैशाख ९ आइतबार

काठमाडौँ । टेक कम्पनी गुगलका सीईओ सुन्दर पिचाईले आफ्ना कर्मचारीहरूलाई राजनीतिलाई कार्यस्थलबाट टाढा राख्न आग्रह गरेका छन् । गुगलबाट २८ कर्मचारीलाई निकालेपछि कम्पनीका कर्मचारीका लागि लेखिएको ब्लग पोस्टमा सीईओले यस्तो बताएका हुन् ।

त्यसमा उनले कर्मचारीलाई कार्यालयमा आएर आफ्नो काम गर्न र राजनीतिमा नलाग्न निर्देशन दिएका छन् । ‘मिशन फर्स्ट’ शीर्षकको आफ्नो नोटमा पिचाईले भने – कम्पनीका नीति र अपेक्षाहरू स्पष्ट छन् । कार्यालयमा राजनीति गर्ने ठाउँ छैन ।

केही कर्मचारीहरूले गुगल र इजरायलबीच सम्झौता भएको १.२ बिलियन डलर बराबरको निम्बस परियोजनाको विरोध गरिरहेका थिए, जुन अमेजनसँगको संयुक्त परियोजना हो । यसमा इजरायली सरकार र सेनालाई क्लाउड सेवा उपलब्ध गराउने बताइएको छ ।

परियोजनाको विरोधमा गुगलको न्यूयोर्क, क्यालिफोर्निया र सन्नीभेल सहरमा एक घण्टा लामो धर्ना दिएपछि प्रहरीले नौ जनालाई पक्राउ गरेको थियो । उनले आफूलाई परिसरबाट बाहिर निकालेर लाइभ स्ट्रिम गरेका थिए । यसपछि गुगलले २८ कर्मचारीलाई बर्खास्त गरेको थियो ।

पिचाईले कर्मचारीहरूलाई आफ्नो नोटमा भनेका छन्, ‘गुगलको संस्कृति सधै खुला संवादलाई बढावा दिने हो । यसले हामीलाई उत्कृष्ट उत्पादनहरू सिर्जना गर्न र राम्रो विचारहरूमा कार्य गर्न सक्षम बनाउँछ । दिमागमा राख्नु पर्ने एउटा कुरा के हो भने हामी कार्यालयमा काम गर्छौं र यहाँ केही नीति र अपेक्षाहरू स्पष्ट छन् ।’