विश्वकपमा श्रीलंकाको खराब शुरुआत, दक्षिण अफ्रिका हावी
हाम्रा कुरा
प्रकाशित २०८१ जेठ २२ मंगलबार
194
Shares
काठमाडौँ । अमेरिका र वेष्ट इन्डिजको संयुक्त आयोजनामा भइरहेको टी–२० विश्वकपमा श्रीलंकाले खराब शुरुआत गरेको छ ।
श्रीलंका दक्षिण अफ्रिकासँग ६ विकेटले पराजित भएको हो । न्यूयोर्कमा भएको पहिले ब्याटिङ गरेको श्रीलंकाले १९.१ ओभरमा अलआउट हुँदै ७७ रनमात्र बनायो । कुसल मेन्डिसले १९, एन्जेलो म्याथ्युजले १६ तथा कामिन्दु मेन्डिसले ११ रन बनाए बाहेक कसैले पनि दोहोरो स्कोर खडा गर्न सकेनन् ।
एन्रिच नोट्जेले ७ रन खर्चेर ४ तथा कागिसो रबाडा र केशव महाराजले २ विकेट लिए ।
जवाफमा दक्षिण अफ्रिकाले १६.२ ओभरमै ४ विकेटको क्षतिमा जित हासिल गर्यो । समूह डीको यो खेलमा श्रीलंकाको यो हारले भने नेपाललाई केही हदसम्म फाइदा पुगेको छ ।
बलियो दक्षिण अफ्रिका अगाडि लाग्दा कम्तीमा श्रीलंकालाई पराजित गर्ने हो भने नेपालको अर्को चरण प्रवेशको सम्भावना बलियो हुन्छ ।
समूह डीको यो खेलमा नेपालले आज पहिलो खेल खेल्दैछ । राति ९ः१५ बजे नेपालले नेदरल्याण्ड्ससँग खेल्ने कार्यक्रम छ ।
