दक्षिण अफ्रिकाविरुद्ध ११६ रन पछ्याउँदै नेपाल, एकै ओभरमा भुर्तेल १३ र पौडेल शून्यमा आउट
हाम्रा कुरा
प्रकाशित २०८१ असार १ शनिबार
147
Shares
काठमाडौँ । अमेरिका र वेष्ट इन्डिजको संयुक्त आयोजनामा भइरहेको टी–२० विश्वकप क्रिकेटको तेस्रो खेलमा अहिले नेपालले दक्षिण अफ्रिकासँग खेलिरहेको छ ।
जितका लागि नेपालले मात्र ११६ रनको चुनौती पछ्याइरहेको छ । नेपालले ७.२ ओभरमा पहिलो विकेटका रुपमा कुशल भुर्तेललाई गुमायो । उनी २१ बलमा १३ रन बनाएर ताबरइज शाम्शीको बलमा आउट भए ।
सोही ओभरमै कप्तान रोहित पौडेल २ बलमा शून्य रनमा आउट भए ।
यसअघि आसिफ शेख व्यक्तिगत १ रन बनाउँदा कागिसो रबाडाबाट क्याचआउट हुनबाट जोगिएका थिए ।
यसअघि वेष्ट इन्डिजको किंग्सटाउनमा नेपालले टस जितेर पहिले बलिङ गर्दै दक्षिण अफ्रिकालाई ११५ रनमा रोक्यो ।
दक्षिण अफ्रिकाले २० ओभरमा ७ विकेट गुमाएर मात्र ११५ रन बनायो । ओपनर रिजा हेन्डरिक्सले ४९ बलमा सर्वाधिक ४३ रन बनाए ।
त्यस्तै ट्रिस्टन स्टुब्सले १८ बलमा अविजित रहँदै २७ रन बनाए ।
नेपालका लागि कुशल भुर्तेलले १९ रन खर्चेर ४ विकेट लिए । त्यस्तै दीपेन्द्र सिंह ऐरीले २१ रन खर्चेर ३ विकेट लिए ।
विश्वकपमा पहिलो पटक खेल्न पाएका सन्दीप लामिछानेले १८ रन खर्चेर कुनै विकेट लिएनन् ।
भुर्तेलले डेभिड मिलरमाथि गरेको एलबीडब्ल्यू आउटको अपील भने अम्पायर कलिङले आउट दिएको थिएन ।
नेपालले पहिलो पटक दक्षिण अफ्रिकासँग खेलिरहेको हो ।
समूह डीबाट दक्षिण अफ्रिका यसअघिका तीन वटै खेल जितेर सुपर एटमा पुगिसकेकोछ भने नेपालले पहिलो खेलमा नेदरल्याण्डसँग हार बेहोरेको थियो भने श्रीलंकासँगको दोस्रो खेल वर्षाले रद्द भएको थियो ।
सुपर एट प्रवेशका लागि सम्भावना जीवितै राख्न नेपाललाई आजको खेल जित्नैपर्ने दबाब छ ।
