टी–२० विश्वकपमा आजदेखि सुपर आठका खेल, अमेरिका र दक्षिण अफ्रिका भिड्दै
हाम्रा कुरा
प्रकाशित २०८१ असार ५ बुधबार
276
Shares
काठमाडौँ । अमेरिका र वेष्ट इन्डिजको संयुक्त आयोजनामा जारी टी–२० विश्वकप क्रिकेट अन्तर्गत आजदेखि सुपर आठका खेल शुरु हुँदैछन् । सुपर आठको पहिलो खेलमा आज अमेरिका र दक्षिण अफ्रिका खेल्दैछन् ।
एन्टिगास्थित सर भीभीएन रिचार्ड्स स्टेडियममा हुने यो खेल नेपाली समय अनुसार राति ८ः१५ बजेदेखि शुरु हुनेछ ।
यस विश्वकपको समूह चरणमा दक्षिण अफ्रिकाले समूह डीका चारै खेलमा जित हासिल गरेर ८ अंक सहित शिर्ष स्थानमा रहेर सुपर आठमा पुगेको छ । दक्षिण अफ्रिका समूह चरणमा भाग्यको साथमा निकै प्रतिष्पर्धात्मक खेलमा जित हासिल गर्दै अगाडि बढेको छ । नेपालसँग एक रनको तथा बंगलादेशसँग ४ रनको जित हासिल गरेको दक्षिण अफ्रिकालाई यस विश्वकपमा भाग्यको साथ रहेको छ ।
त्यस्तै अमेरिका भने यस विश्वकपको सरप्राइज टिम बनेर अगाडि आएको छ । अमेरिकाले समूह चरणमा पाकिस्तानलाई पराजित गरेर अगाडि बढेको छ । त्यस्तै अमेरिकाले भारतसँगको खेल हारे पनि क्यानाडालाई पराजित गरेको थियो भने आयरल्याण्डविरुद्धको खेल वर्षाले रद्ध भएको थियो ।
टी–२० अन्तर्राष्ट्रिय खेलमा दक्षिण अफ्रिका र अमेरिका अहिलेसम्म खेलेका छैनन् । पहिलो पटक खेलिरहेका दुवैका लागि सेमिफाइनलको यात्राका लागि यो खेल महत्वपूर्ण रहेको छ ।
सुपर आठको समूह २ मा रहेका दुवै देशले वेस्ट इन्डिज र इङल्याण्डसँग एक एक खेल खेल्ने छन् ।
