नेपालमा नै बनेको एनसेल एपमा अब माछापुच्छ्रे बैङ्कको प्लेटफर्म मार्फत भुक्तानी
हाम्रा कुरा
प्रकाशित २०८१ असार ९ आइतबार
794
Shares
काठमाडौँ। माछापुच्छ्रे बैङ्क लिमिटेड र एनसेलबीच डिजिटल प्लेटफर्म मार्फत सेवा प्रदान गर्नका लागि सम्झौता पत्रमा हस्ताक्षर भएको छ। उक्त सम्झौता पत्रमा एनसेलका प्रमुख कार्यकारी अधिकृत जाब्बोर कायुमोभ र माछापुच्छ्रे बैङ्क लिमिटेडको तर्फबाट प्रमुख कार्यकारी अधिकृत सन्तोष कोइरालाले गत हप्ता एनसेल आइकन, लैनचौरमा हस्ताक्षर गरेका थिए।
मोबाइलमा डेटा सकिए पछि ब्यालेन्स नकाटिने र अन्य सुविधाहरू रहेको एनसेलको ‘सधैँ अन’ योजना अन्तर्गत गरिएको यस सम्झौता अनुसार, अब माछापुच्छ्रे बैङ्कमा आफ्नो खाता भएका एनसेलका ग्राहकहरूले बैङ्कको मोबाइल बैङ्किङ एप एमबीएल एम–स्मार्ट को चेक आउट सर्भिस प्रयोग गरी एनसेलको मोबाइल एप, रिटेलर्स एप, वेबसाइटमार्फत सजिलै ब्यालेन्स रिचार्जका साथै सेवा, सुविधाहरू खरिदका लागि भुक्तानी गर्न सक्नेछन्। यसै गरी एनसेलका वितरक तथा खुद्रा बिक्रेताहरूले पनि रिटेलर्स एपमार्फत सिधै माछापुच्छ्रे बैङ्कको खातामा रहेको रकमबाट आफ्नो भर्चुअल फन्ड लोड गर्न सकिने बैङ्कले जनाएको छ।
यस सम्झौताले ग्राहकको डिजिटल यात्रालाई असहज बनाउँदै सधैँ अन रहन सहयोग गर्ने विश्वास एनसेल र माछापुच्छ्रे बैङ्कले लिएको छ। एनसेल एपमा अन्य सुविधाहरू पनि रहेका छन् जसले ग्राहकहरूलाई देशभित्र मात्र नभई देश बाहिर रोमिङमा रहँदा पनि सुविधा प्रदान गर्नेछ।
माछापुच्छ्रे बैङ्क लिमिटेड नगद रहित बैङ्किङलाई बढवा दिँदैँ पहिलो डिजिटल स्मार्ट बैङ्कको रूपमा आफूलाई स्थापित गर्ने लक्ष्यका साथ निरन्तर अगाडी बढी रहेको छ। फरक–फरक माध्यमहरू मार्फत डिजिटल भुक्तानी सुविधालाई सहज बनाउन आफ्ना ग्राहकहरूका लागि नवीन उत्पादन र सेवाहरू ल्याउन माछापुच्छ्रे बैङ्क सधैँ तत्पर रहँदै आएको छ।
