दक्षिण अफ्रिका पहिलो पटक विश्वकप क्रिकेटको फाइनलमा
नेपालसँग हार नजिक पुगेर पनि १ रनले जितेको टिमले सेमिफाइनलमा अफगानिस्तानलाई हरायो ९ विकेटले
हाम्रा कुरा
प्रकाशित २०८१ असार १३ बिहिबार
326
Shares
काठमाडौँ । दक्षिण अफ्रिका पहिलो पटक विश्वकप क्रिकेटको फाइनलमा पुगेको छ । अहिलेसम्म सेमिफाइनलसम्म मात्र पुग्दै आएको दक्षिण अफ्रिका बिहीबार बिहान टी–२० विश्वकप क्रिकेटको फाइनलमा पुगेर कीर्तिमान रचेको हो ।
टारोउवामा भएको सेमिफाइनलमा दक्षिण अफ्रिकाले पहिलो पटक सेमिफाइनलमा पुगेर कीर्तिमान रचेको अफगानिस्तानलाई ९ विकेटले पराजित गरेको हो ।
टस जितेर पहिले ब्याटिङ गरेको अफगानिस्तानले ११.५ ओभरमा अलआउट हुँदै ५६ रनमात्र बनाउन सक्यो ।
अज्मतुल्लाह ओमरजाईले मात्र दोहोरो अंक जोड्ने क्रममा १० रन बनाए । सर्वाधिक १३ रन भने अतिरिक्तका रुपमा आएको थियो ।
दक्षिण अफ्रिकाका लागि मार्को जासेन र तबरैज शाम्सीले ३–३ तथा कागिसो रबाडा र एन्रिच नोट्जेले समान २–२ विकेट लिए ।
जवाफमा दक्षिण अफ्रिकाले ८.५ ओभरमै १ विकेटको क्षतिमा जित हासिल गर्यो ।
रिजा हेन्रिकले २५ बलमा अविजित रहँदै २९ तथा कप्तान आइडेन मार्करमले २१ बलमा अविजित रहँदै २३ रन बनाए ।
दक्षिण अफ्रिका पनि विश्वकपमा अभागी टिम रहँदै आएको छ । अहिलेसम्म कुनै पनि उपाधि नजितेको दक्षिण अफ्रिका पहिलो पटक फाइनलमा पुगेको हो । यसअघि एक दिवसीय र टी–२० गरी सात पटक सेमिफाइनलबाट बाहिरिएको थियो ।
दक्षिण अफ्रिकाले समूह चरणमा नेपालसँग मात्र एक रनको जित हासिल गरेको थियो । नेपाल कीर्तिमान नजिक पुगेर पनि बाहिरिनु पराजय बेहोर्न पुग्यो ।
