-
-
-
-
काठमाडौँ । नेपाल काठमाडौँमा जारी काभा महिला भलिबल लिगको सेमिफाइनलमा पुगेको छ । लिग चरणको अन्तिम खेलमा माल्दिभ्सलाई ३–० को सोझो सेटमा पराजित गर्दै नेपाल दोस्रो स्थानमा रहेर सेमिफाइनलमा पुगेको हो ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सम्पन्न खेलमा नेपालले एकतर्फी प्रदर्शन गर्दै माल्दिभ्सलाई २५–८, २५–१९ र २५–१८ ले जित्यो ।
यो जितसँगै नेपाल दोस्रो हुँदै सेमिफाइनलमा पुग्यो । भारत १० अंकसहित शीर्ष स्थानमा रहँदै सेमिफाइनलमा पुग्यो भने नेपाल ९ अंकसहित दोस्रो हुँदै सेमिफाइनलमा पुग्यो ।
त्यस्तै ७ अंकसहित तेस्रो स्थानमा रहेर इरान तथा चौथो स्थानमा रहेर श्रीलंका सेमिफाइनलमा पुगेको छ ।
सेमिफाइनलमा नेपालको भिडन्त इरानसँग हुनेछ । लिग चरणमा नेपाल इरानसँग ३–२ को सेटमा पराजित भएको थियो ।
सेमिफाइनल खेल मंगलबार हुने छन् । मंगलबार अपरान्ह ३ बजे भारत र श्रीलंका तथा साँझ ५ः१५ बजे नेपाल र इरान खेल्नेछन् ।
