उपाधिका लागि नेपाल र भारत भिड्दै, नेपाल कीर्तिमान रच्न आतुर
हाम्रा कुरा
प्रकाशित २०८१ साउन २३ बुधबार
2.2k
Shares
काठमाडौँ । नेपालले आज काभा महिला भलिबल नेसन्स लिगको फाइनलमा भारतको सामना गर्दैछ । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा हुने फाइनल खेल साँझ ५ बजेदेखि शुरु हुने छ ।
मंगलबार सम्पन्न सेमिफाइनल खेलमा नेपालले इरानलाई सोझो सेटमा ३–० ले पराजित गरेको थियो । त्यस्तै पहिलो सेमिफाइनलमा भारतले श्रीलंकालाई ३–० ले पराजित गरेको थियो ।
नेपाल लिग चरणमा इरानसँग पराजित भएको भए पनि सेमिफाइनलमा भने उत्कृष्ट प्रदर्शन गर्यो । अहिलेसम्म नेपालले इरानलाई हराउन सकेको थिएन ।
त्यस्तै लिग चरणमा नेपालले भारतलाई पराजित गरेर कीर्तिमान रचेको थियो । महिला भलिबल टिमले पहिलो पटक भारतलाई हराएको थियो ।
नेपालले भारतलाई पराजित गरिसकेको हुनाले आज फाइनलमा उच्च मनोबलका साथ खेल्दैछ । यो खेल जितेर उपाधि हासिल गर्दा नेपाली महिला टिमले अझ ठूलो छलाङ मार्नेछ ।
फाइनल खेलमा खेलाडीको मनोबल बढाउन प्रधानमन्त्री केपी शर्मा ओलीसमेत उपस्थित हुने भएका छन् ।
त्यस्तै आजै तेस्रो स्थानको खेल इरान र श्रीलंकाबीच दिउँसो २ बजेदेखि हुनेछ ।
नेपालको राष्ट्रिय खेल भलिबल भए पनि अहिलेसम्म त्रिपुरेश्वरमा रहेको सदाबहार बाहेक कुनै पनि कोर्ट रहेको छैन ।
