काठमाडौँ । काभा महिला भलिबल नेसन्स लिगमा नेपाल उपविजेतामै सीमित भएको छ । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा बुधबार बेलुकी भएको फाइनल खेलमा नेपाल भारतसँग पराजित भएको हो ।
निरन्तर सेटमा अग्रता लिए पनि नेपालले अन्तिम सेट गुमाउँदै उपाधि नै गुमाउन पुगेको हो । नेपाल पहिलो सेट जितेर अग्रता लिन सफल भए पनि दोस्रो सेट जितेर भारतले १–१ को बराबरी गर्यो ।
तेस्रो सेट जितेर नेपालले २–१ को अग्रता लियो । तर भारतले त्यसपछिका दुवै सेट जितेर उपाधि नै जित्यो ।
नेपालले लिग चरणमा भारतलाई हराएर पहिलो पटक भारतमाथि जित हासिल गर्ने इतिहास रचेको भए पनि त्यो इतिहासलाई दोहोर्याउन भने सकेन ।
नेपालले सेमिफाइनलमा इरानलाई सोझो सेटमा ३–० को सोझो सेटमा पराजित गरेको थियो भने भारतले श्रीलंकालाई ३–० ले पराजित गरेको थियो ।
नेपाल लिग चरणमा इरानसँग पराजित भएको भए पनि सेमिफाइनलमा भने उत्कृष्ट प्रदर्शन गर्यो । अहिलेसम्म नेपालले इरानलाई हराउन सकेको थिएन ।
इरान भने तेस्रो भएको छ । तेस्रो स्थानको भिडन्तमा इरानले श्रीलंकालाई ३–० ले हरायो ।