नेकपा एसमा पदीय हानथाप, १८ पदाधिकारीका लागि मंगलबार निर्वाचन

हाम्रा कुरा

प्रकाशित २०८१ भदौ १० सोमबार

काठमाडौँ । नेकपा (एकीकृत समाजवादी) का १८ पदाधिकारीका लागि सोमबार दिनभर सहमति जुट्न नसकेपछि निर्वाचन हुने भएको छ ।

सहमतिको प्रयास असफल भएपछि पदाधिकारी र पोलिटब्युरो सदस्यका लागि निर्वाचन हुन लागेको निर्वाचन अधिकृत माधव पौडेलले बताए ।

खासगरी एसको वरिष्ठ उपाध्यक्षमा राजेन्द्र पाण्डे, बेदुराम भुषाल र प्रमेश हमालले दाबी गरेपछि सहमति हुन नसकेको हो ।

पछिल्लो पटक अध्यक्ष माधवकुमार नेपालले प्रमेश हमाललाई साथ लिएर बैठक र भेटघाटमा सहभागी हुँदै आएका छन् ।

भुषालले पनि वरिष्ठ उपाध्यक्षको दाबी छाड्न सकेका छैनन् । पाण्डेले कुनै पनि हालतमा नछाड्ने बरु निर्वाचन गरेमा आफूले जितेर देखाइदिने बताउदै आएका छन् ।

पदाधिकारी र पोलिटब्युरो सदस्यको निर्वाचनका लागि एकीकृत समाजवादीले निर्वाचन तालिका सार्वजनिक गरेको छ ।

तालिकाअनुसार मंगलबार दिउँसो २ देखि ५ बजेसम्म मतदान हुने छ । मंगलबारनै मतगणना थालिने जनाइएको छ ।

यसअघि एकीकृत समाजवादीले अध्यक्षमा माधवकुमार नेपाल, सम्मानित नेतामा झलनाथ खनाल र महासचिवमा घनश्याम भुषाललाई सर्वसम्मत चयन गरेको थियो ।

मंगलबार अन्य पदाधिकारीका लागि निर्वाचन हुन लागेको हो । मंगलबार एकीकृत समाजवादीले २१ पदाधिकारीमध्ये वरिष्ठ उपाध्यक्षसहित सात उपाध्यक्ष, चार उपमहासचिव र सात सचिव चयन गर्ने छ ।

उपमहासचिवमा पनि जगन्नाथ खतिवडा, प्रकाश ज्वाला, गंगालाल तुलाधर, राजेन्द्र राई, जीवनराम श्रेष्ठ लगायतले दाबी गरेका छन् ।

विजय पौडेल पनि लागिरहेका छन् । विरोध खतिवडा र किसान श्रेष्ठले उपाध्यक्षमा दाबी गरिरहेका छन् ।

जयन्ती राई र रामकुमारी झाक्रीले उपाध्यक्षमा दाबी गरिरहेका छन् ।

सचिवमा पछिल्लो पटक सुदेश पराजुलीले पनि दाबी गरिरहेका छन् ।