गम्भीर श्रेणीमा वायु प्रदूषण भएसँगै दिल्लीमा आधा कर्मचारीलाई ‘वर्क फ्रम होम’ लागू
हाम्रा कुरा
प्रकाशित २०८१ मंसिर ५ बुधबार
239
Shares
काठमाडौँ । भारतको दिल्लीमा वायु प्रदूषणको गम्भीर स्तरलाई ध्यानमा राख्दै, दिल्ली सरकारले सबै सरकारी विभागहरूमा ५० प्रतिशत कर्मचारीलाई वर्क फ्रम होम लागू गरेको छ।
दिल्ली सरकारका पर्यावरण मन्त्री गोपाल राईले दिल्ली सरकारले राज्यमा प्रदूषण नियन्त्रण गर्न धेरै कदम चालिरहेको बताउँदै आधा कर्मचारीलाई‘वर्क फ्रम होम’ लागू गरिएको जानकारी दिएका छन् ।
उनले भनेका छन्, ‘दिल्ली सरकारअन्तर्गतको आपतकालीन विभागबाहेक सबै विभागमा ५० प्रतिशत काम घरबाटै गर्ने निर्णय भएको छ ।’
उनले दिल्ली सरकारले निजी क्षेत्रका कम्पनी र कार्यालयहरूलाई पनि ५० प्रतिशत वर्क फ्रम होम लागू गर्न सुझाव दिएको बताए ।
यसबाहेक दिल्ली सरकारले कार्यालयको समय परिवर्तन गर्न र कर्मचारीहरूको सुविधाका लागि शटल बस सेवा प्रयोग गर्न पनि सुझाव दिएको छ ।
जाडो मौसममा दिल्लीको वायुमा प्रदूषणको स्तर दिनानुदिन बढिरहेको छ । बुधबार दिल्लीको वायुमा प्रदूषणको स्तर ‘गम्भीर’ श्रेणीमा रेकर्ड गरिएको थियो ।
केन्द्रीय प्रदूषण नियन्त्रण बोर्डको वेबसाइटमा उपलब्ध तथ्याङ्कअनुसार बुधबार अपरान्ह ४ बजे सबैभन्दा बढी प्रदूषित हावा बवाना क्षेत्रमा रहेको थियो ।
अपराह्न ४ बजे बवानामा एक्यूआई ४५९ रेकर्ड गरिएको थियो । यसलाई वायु प्रदूषणको ‘गम्भीर’ श्रेणी मानिन्छ । बवाना बाहेक, दिल्लीका अन्य धेरै क्षेत्रमा एक्यूआई ४०० र ५०० को बीच रेकर्ड गरिएको थियो ।
बेलुकी ६ः५६ बजे एक्यूआई २०९ रहेको छ । दिल्ली विश्वकै शीर्ष स्थानमा रहेको छ ।
