एसको सचिवालय बैठक असार १३ गते, बजेट र पतञ्जली प्रकरण मुख्य एजेण्डा
हाम्रा कुरा
प्रकाशित २०८२ असार ११ बुधबार
495
Shares
काठमाडौं। नेपाल कम्युनिष्ट पार्टी (एकीकृत समाजवादी) ले यही असार १३ गते सचिवालय बैठक आह्वान गरेको छ। पार्टी केन्द्रीय कार्यालय आलोकनगरमा बस्ने उक्त बैठकमा विभिन्न महत्त्वपूर्ण एजेन्डाहरूमा छलफल हुनेछ।
पार्टी केन्द्रीय प्रचार विभागका उपप्रमुख दामोदर अर्यालका अनुसार, बैठकमा आगामी आर्थिक वर्षका लागि सरकारद्वारा सार्वजनिक गरिएको बजेटमा पार्टीको दृष्टिकोण बारे छलफल हुनेछ। यसका साथै, नेता तथा कार्यकर्तालाई राजनीतिक प्रशिक्षण दिने विषय र संसदको चालू अधिवेशनमा पार्टीको भूमिका लगायतका विषयमा पनि छलफल गरिनेछ।
बैठकमा केन्द्रीय कमिटीले गरेका निर्णय कार्यान्वयनका विषयमा पार्टी मातहतका प्रदेश, जिल्ला, र सम्बन्धित कमिटीबाट प्राप्त सुझावअनुसार विभागलाई पूर्णता दिने तथा नेताहरूको जिम्मेवारी हेरफेर गर्ने बारे पनि छलफल हुनेछ। पार्टीभित्रका आन्तरिक विवाद समाधान र आगामी रणनीतिका विषयमा पनि बैठक केन्द्रित हुनेछ।
सचिवालय बैठकको कार्यसूचीमा अख्तियार दुरुपयोग अनुसन्धान आयोगले पतञ्जली जग्गा सट्टापट्टा प्रकरणमा पार्टी अध्यक्ष माधवकुमार नेपाललाई गत जेठ २२ गते विशेष अदालतमा दायर गरेको मुद्दाको प्रतिरक्षामा पार्टीका तर्फबाट भएका अनुसन्धानबारे छलफल गर्ने विषय पनि समावेश छ।
बैठकले समसामयिक राजनीतिक घटनाक्रम, सांगठनिक कार्यक्रम, र पार्टीले देशभर सञ्चालन गरेको राजनीतिक अभियानको समीक्षा गरी नयाँ चरणको कार्यक्रम तय गर्ने उपप्रमुख अर्यालले जानकारी दिएका छन्।
यो बैठकले एकीकृत समाजवादीको आगामी राजनीतिक दिशा र पार्टीभित्रको आन्तरिक व्यवस्थापनमा महत्त्वपूर्ण प्रभाव पार्ने देखिन्छ। यस बैठकपछि पार्टीले बजेट, राजनीतिक प्रशिक्षण, र सांगठनिक संरचनाबारे के कस्ता निर्णयहरू गर्ला भन्ने चासो बढेको छ।
