मानव अधिकार विज्ञमाथि अमेरिकी प्रतिबन्ध अस्वीकार्य: संयुक्त राष्ट्र
हाम्रा कुरा
प्रकाशित २०८२ असार २७ शुक्रबार
1.5k
Shares
काठमाडौं। संयुक्त राष्ट्रसंघका प्रवक्ताले संयुक्त राष्ट्र मानव अधिकार विज्ञहरूमाथि अमेरिकाले लगाएको प्रतिबन्ध अस्वीकार्य रहेको बताएका छन्। उनले संयुक्त राष्ट्रसंघका विशेष प्रतिवेदकहरूमाथि प्रतिबन्ध लगाउनु एक खतरनाक उदाहरण भएको टिप्पणी गरेका छन्।
संयुक्त राष्ट्रसंघका महासचिव एन्टोनियो गुटेरेसका प्रवक्ता स्टेफेन डुजारिकले यो भनाइ कब्जा गरिएको प्यालेस्टिनी भूभागमा मानव अधिकारको अवस्थाबारे संयुक्त राष्ट्रसंघका विशेष प्रतिवेदक फ्रान्सेस्का अल्बानीजमाथि अमेरिकी प्रतिबन्ध लगाएपछि आएको हो।
वाशिङ्टनले प्यालेस्टिनीहरूविरुद्ध इजरायली मानव अधिकार उल्लङ्घनको अनुसन्धानमा संलग्न भएको भन्दै अल्बानीजमाथि प्रतिबन्धहरूको घोषणा गरेको थियो। यी प्रतिबन्धहरू अमेरिकी राष्ट्रपति डोनाल्ड ट्रम्पले फेब्रुअरीमा हस्ताक्षर गरेको कार्यकारी आदेशपछि आएका हुन्। उक्त आदेशमा अन्तर्राष्ट्रिय फौजदारी अदालतले संयुक्त राज्य अमेरिका र इजरायललाई लक्षित गरी ’अवैध र आधारहीन कार्य’ को रूपमा वर्णन गरेका विषयमा दण्डात्मक कारबाहीलाई अधिकार दिइएको थियो।
