सुर्खेत । बलात्कारपछि हत्या गरिएकी सुर्खेतकी १६ वर्षे इनिशा विकलाई न्यायको माग गर्दै सुर्खेतमा विद्यार्थीहरू प्रदर्शनमा उत्रिएका छन् । इनिशा अध्ययनरत विद्यालय उषा बालबाटिकाका विद्यार्थी, शिक्षक कर्मचारीहरुले वीरेन्द्रनगरमा प्रदर्शन गरेका छन् ।

विद्यालय पोशाकमै रहेका उनीहरुले केही समय जिल्ला प्रहरी कार्यालयको गेटमा नाराबाजीसमेत गरेका छन् । ‘इनिशालाई न्याय दे’, ‘हत्यारालाई फाँसी दे’ ‘छोरी मार्न पाइँदैन’ लगायतका नारा लेखिएका प्लेकार्डसहित उनीहरुले प्रदर्शन गरेका हुन् ।

फागुन २३ गते इनिशा सुर्खेतको सामुदायिक जंगलमा मृत अवस्थामा भेटिएकी थिइन् । अनुसन्धान प्रहरीको केन्द्रीय अनुसन्धान ब्युरो (सीआईबी) को टोली सुर्खेत पुगेर घटनाको अनुसन्धान थालेको छ । 

घटना अनुसन्धान गर्न प्रहरी निरीक्षकको नेतृत्वमा सीआईबीको विज्ञ टोली वीरेन्द्रनगर आएर अनुसन्धान थालेको जिल्ला प्रहरी कार्यालय सुर्खेतका प्रमुख प्रहरी उपरीक्षक सुधीरराज शाहीले बताए । 

जिल्ला प्रहरी कार्यालय सुर्खेतले प्रारम्भिक अनुसन्धानको काम सकेको र घटनामा प्राप्त प्रमाणको वैज्ञानिक र प्राविधिक विश्लेषणका लागि सीआईबीको सहयोग लिनु परेको शाहीले बताए ।

अनुसन्धानका पोस्टमार्टम रिपोर्ट र अन्य प्रमाणहरु प्राप्त भइसकेकोले अनुसन्धानको अन्तिम निश्कर्षमा पुग्न सिआइवीको सहयोग लिनु परेको अनुले बताए ।

 ‘धेरै प्रमाणहरुको परीक्षण भइरहेको छ’ उनले भने, ‘पोस्टमार्टम रिपोर्ट आयो, मोबाइल फोनहरु केन्द्रीय विधिविज्ञान प्रयोगशालामा टक्सिकोलोजिकल र बायोसेरोलोजिकल परीक्षण भइरहेको छ ।’ 

प्रयोगशालाका रिपोर्टहरु आएपछि घटनाको वास्तविकता पत्ता लाग्ने उनले बताए । उपरीक्षक शाहीका अनुसार जिल्ला प्रहरी कार्यालय सुर्खेतमा विज्ञ टोली गठनसंगै कर्णाली प्रदेश प्रहरी कार्यालय नेपालगञ्जबाट पोलिग्राफ गर्ने टोली पनि पुगेको छ । 

पोलियाग्राफीले मानिसले झुटो बोलेको पत्ता लगाउने उनले जानकारी दिए । मृत्युको कारण पत्ता लगाउन घटनास्थलको सम्पूर्ण प्रमाणहरु प्रयोगशालामा पठाइएको शाहीले बताए ।

एक सातादेखि इनिशाको शव आफन्तले बुझ्न मानेका छैनन् । कर्णाली प्रादेशिक अस्पतालको शवगृहमा इनिशाको शव राखिएको छ । सामूहिक बलात्कार पछि हत्या गरिएकाले इनिशाको हत्यामा संलग्नलाई कारबाही हुने विश्वस्त वातावरण नभएसम्म आफन्तले शब नबुझ्ने अडान राखेका छन् । 

रोजगारीको लागि दुबइमा रहेका इनिशाका बुबा छोरीको हत्याको खबर पाएपछि दुबईबाट भारत हुँदै सुर्खेत पुगेका छन् । वीरेन्द्रनगरमा रहेकी उनकी आमा छोरीको हत्या भएकै दिनदेखि विक्षिप्त बनेकी छिन् । 

सुर्खेत पुगेका बुबा इन्द्रबहादुरले छोरीले न्याय नपाएसम्म शव नबुझ्ने बताए । ‘योजनाबद्ध रुपमा छोरीको हत्या गरिएको छ’ उनले भने, ‘पार्कबाट जंगलतिर लगेर हत्या गरिएको हो ।’