न्यून चापीय प्रणाली र स्थानीय वायुको मिश्रित प्रभावले मौसममा फेरबदल
पहाडी भेगमा वर्षा र हिमपातको सम्भावना, तराईमा हावाहुरीको जोखिम
हाम्रा कुरा
प्रकाशित २०८२ चैत २७ शुक्रबार
757
Shares
काठमाडौँ । हाल नेपालमा पश्चिमी न्यून चापीय प्रणाली र स्थानीय वायुको मिश्रित प्रभाव रहेकाले देशका विभिन्न भागको मौसममा फेरबदल आउने मौसम पूर्वानुमान महाशाखाले जनाएको छ।
आज दिउँसो कोशी, बागमती र गण्डकी प्रदेशका हिमाली क्षेत्रहरूमा साधारणतया बदली रहनेछ। कोशी प्रदेशका पहाडी तथा तराईका भू-भाग र अन्य प्रदेशका पहाडी क्षेत्रमा आंशिक बदली हुने देखिए पनि बाँकी तराईका भू-भागमा भने मौसम मुख्यतया सफा रहने महाशाखाको अनुमान छ। कोशी, बागमती र गण्डकी प्रदेशका पहाडी तथा हिमाली क्षेत्रका एक-दुई स्थानमा हल्का वर्षा र हिमपातको सम्भावना रहेको छ। यस्तै, लुम्बिनी र सुदूरपश्चिम प्रदेशका तराई क्षेत्रका केही स्थानमा हावाहुरी चल्ने सम्भावना रहेकाले सचेत रहन आग्रह गरिएको छ।
राति कोशी प्रदेश र देशका अन्य हिमाली भू-भागमा साधारणतया बदली रहनेछ भने बाँकी पहाडी भेगमा आंशिक बदली हुनेछ। तराईका क्षेत्रमा भने रातिको मौसम सफा रहनेछ। कोशी र गण्डकी प्रदेशका पहाडी तथा हिमाली क्षेत्रका केही स्थानहरूमा मेघगर्जन र चट्याङ्गसहित हल्का वर्षा तथा हिमपातको सम्भावना रहेको छ। अन्य हिमाली भू-भागका एक-दुई स्थानमा पनि हल्का हिमपात हुन सक्ने महाशाखाले जनाएको छ।
मौसममा आउने यस्तो परिवर्तनका कारण पहाडी र हिमाली क्षेत्रका बासिन्दा तथा तराईमा हावाहुरीको जोखिम रहेका क्षेत्रका सर्वसाधारणलाई आवश्यक सतर्कता अपनाउन मौसमविद्हरूले सुझाव दिएका छन्।
