पहाडमा वर्षा र हिमपातको सम्भावना, तराईमा 'लु' को जोखिम
हाम्रा कुरा
प्रकाशित २०८३ वैशाख १० बिहिबार
635
Shares
काठमाडौँ। नेपालमा हाल पश्चिमी र स्थानीय वायुको आंशिक प्रभावले गर्दा मौसममा विविधता देखिएको छ, जसका कारण पहाडी र हिमाली क्षेत्रमा बदली तथा वर्षाको सम्भावना रहँदा तराई भेगमा भने अत्यधिक गर्मी बढ्ने देखिएको छ।
जल तथा मौसम विज्ञान विभाग, मौसम पूर्वानुमान महाशाखाले जारी गरेको पछिल्लो बुलेटिन अनुसार कोशी, गण्डकी र कर्णाली प्रदेशका पहाडी तथा हिमाली भूभागमा मेघगर्जन र चट्याङसहित मध्यम स्तरको वर्षा र हिमपातको सम्भावना रहेको छ।
पहाडी क्षेत्रमा वर्षाको संकेत देखिए पनि तराईका जिल्लाहरूमा भने मौसम मुख्यतया सफा रहनेछ, तर मधेश प्रदेशसहित कोशी, बागमती, गण्डकी, लुम्बिनी र सुदूरपश्चिमका तराई तथा उपत्यका एवं खोँचहरूमा 'तातो दिन' हुने प्रक्षेपण गरिएको छ।
विशेषगरी लुम्बिनी र सुदूरपश्चिम प्रदेशका तराई क्षेत्रमा तातो लहर (लु) चल्न सक्ने सम्भावना रहेकाले सर्वसाधारणलाई सतर्क रहन आग्रह गरिएको छ। आज रातिको समयमा कोशी, बागमती, गण्डकी र कर्णाली प्रदेशका हिमाली भूभागमा आंशिक बदली रहे पनि अन्य क्षेत्रको मौसम भने सफा रहने महाशाखाले जनाएको छ।
राति कोशी प्रदेशको हिमाली क्षेत्रका एक-दुई स्थानमा हल्का वर्षा र हिमपात हुन सक्ने अनुमान गरिएको छ। तराईमा बढ्दो तापक्रम र पहाडमा हुन सक्ने आकस्मिक मौसमी परिवर्तनलाई ध्यानमा राख्दै आवश्यक सावधानी अपनाउन मौसमविद्हरूले सुझाव दिएका छन्।
