काठमाडौँ । राष्ट्रिय स्वतन्त्र पार्टी (रास्वपा) को कर्णाली प्रदेश सभापतिमा मदन खड्का विजयी भएका छन्।
मंगलबार सम्पन्न पार्टीको प्रथम कर्णाली प्रदेश महाधिवेशनबाट नन्दकिशोर बस्नेत र स्नेहा उपाध्यायलाई पराजित गर्दै खड्का विजयी भएका हुन्।
कुल खसेको ४०० मतमध्ये खड्काले २८८ मत प्राप्त गरेको निर्वाचन समितिले जानकारी दिएको छ। उनका प्रतिस्पर्धीद्वय उपाध्याय र बस्नेतले क्रमशः ६३ र ३५ मत प्राप्त गरे।
सभापतिमा निर्वाचित खड्का पार्टी स्थापनादेखि संगठन विस्तार तथा सुदृढीकरणमा महत्वपूर्ण भूमिका खेलेका व्यक्तिका रूपमा चिनिन्छन्।
त्यस्तै अर्का प्रतिस्पर्धी बस्नेत गत फागुनमा नेकपा (एमाले) बाट रास्वपामा प्रवेश गरेका थिए। उनी गत प्रतिनिधिसभा सदस्य निर्वाचनमा दैलेख क्षेत्र नं १ बाट उम्मेदवार बनेका थिए।
