मकवानपुर । सवारी दुर्घटना न्यूनीकरण गर्ने उद्देश्यले मकवानपुरमा सार्वजनिक तथा निजी सवारी साधनका चालकहरूको लागू पदार्थ सेवन परीक्षण (ड्रग टेस्ट) जाँच अभियान सञ्चालन गरिएको छ ।
३९औँ अन्तर्राष्ट्रिय लागुऔषध दुरुपयोग तथा अवैध ओसारपसारविरुद्ध दिवसको अवसरमा आयोजित सप्ताहव्यापी कार्यक्रमअन्तर्गत आइतबार हेटौँडा उपमहानगरपालिका-२ चौकीटोल र वडा नं. १५ रातोमाटे क्षेत्रमा विशेष चेकजाँच अभियान सञ्चालन गरिएको हो ।
जिल्ला ट्राफिक प्रहरी कार्यालय मकवानपुरको आयोजनामा तथा जिल्ला प्रहरी कार्यालय मकवानपुर र जिल्ला जनस्वास्थ्य कार्यालय हेटौँडाका स्वास्थ्यकर्मीहरूको सहकार्यमा सञ्चालन गरिएको अभियानमा लामो तथा छोटो दूरीमा चल्ने निजी तथा यात्रुवाहक सवारी साधनका चालकहरूको लागुपदार्थ सेवन परीक्षण गरिएको थियो ।
प्रहरीका अनुसार दुई चरणमा गरिएको परीक्षणमा कुल एक सय १० जना चालकको ड्रग टेस्ट गरिएको थियो । जसमध्ये १० जना चालकले लागुपदार्थ सेवन गरेको पुष्टि भएको छ ।
लागुपदार्थ सेवन गरेको पाइएका चालकलाई आवश्यक कानूनी कार्बाहीका लागि जिल्ला प्रहरी कार्यालय मकवानपुर पठाइएको जिल्ला ट्राफिक प्रहरी कार्यालयले जनाएको छ ।
जिल्ला प्रहरी कार्यालय मकवानपुरका प्रहरी नायव उपरीक्षक मदनकुमार काफ्लेका अनुसार लागुपदार्थ सेवन गरी सवारी चलाउने चालकविरुद्ध प्रचलित कानूनअनुसार कार्बाही प्रक्रिया अघि बढाइएको छ।
उनले यस्ता निगरानी तथा परीक्षण अभियान आगामी दिनमा पनि निरन्तर सञ्चालन गरिने बताए ।
प्रहरीले लागुपदार्थ सेवन गरी सवारी सञ्चालन गर्दा दुर्घटनाको जोखिम उल्लेखनीय रूपमा बढ्ने भएकाले चालकलाई सचेत रहन आग्रह गर्दै निगरानी र सचेतनामूलक कार्यक्रमलाई थप प्रभावकारी बनाइएको जनाएको छ ।
