काठमाडौँ । विश्वकप फुटबलमा आज राति एउटामात्र खेल हुँदैछ । राति पौने १० बजे इङ्गल्याण्डले डीआर कंगोसँग खेल्दैछ ।
इङ्गल्याण्डले विश्वकपमा सन् १९६६ मा एकपटक उपाधि उचालेको छ । सन् १९९० र २०१८ मा चौथो स्थान हासिल गरेको छ ।
इङ्गल्याण्ड सन् २०२२ को विश्वकपसहित सात पटक क्वार्टरफाइनलमा पुगेको छ । सन् १९३० देखि शुरू भएको आधुनिक विश्वकपका शुरूआती तीन विश्वकपमा सदस्य राष्ट्र नभएकैले खेल्न पाएन ।
सन् १९५० देखि विश्वकप खेल्न पाएको इङ्गल्याण्ड सन् १९७४, १९७८ र १९९४ मा विश्वकपमा छनोट नै हुन सकेन ।
सन् १९५०, सन् १९५८ र सन् २०१४ मा इङ्गल्याण्ड विश्वकपको पहिलो चरणबाट अगाडि जानै सकेन ।
यो विश्वकपको समूह चरणमा इङ्गल्याण्डले पानामालाई २–० ले हराउँदा क्रोएसियालाई ४–२ ले पराजित गर्यो । घानासँग भने गोलरहित बराबरी खेल्यो ।
यता कंगो भने सन् १९७४ पछि पहिलो पटक विश्वकप खेलिरहेको हो । ५२ वर्षपछि विश्वकप खेल्न पाएको कंगो नकआउटमा प्रवेश गर्नु नै ठूलो कुरा भइसकेको छ ।
पहिलो पटक नकआउट खेल्दै गरेको कंगोले कुन चमत्कार गर्ने हो भने भन्ने केही समयपछिको खेलले देखाउने नै छ ।
समूह चरणमा कंगोले नवप्रवेशी टिम उज्बेकिस्तानलाई ३–१ ले हराउँदा कोलम्बियासँग १–० ले पराजित भयो । त्यस्तै पोर्चुगलतसँग भने १–१ गोलको बराबरी खेल्यो ।
अहिलेसम्म को को पुगे प्रिक्वार्टरफाइनलमा ?
अहिलेसम्म सहआयोजक क्यानाडा, ब्रजिल, पाराग्वे, नर्वे, फ्रान्स र मेक्सिको प्रिक्वार्टरफाइनलमा प्रवेश गरेका छन् ।
अन्तिम ३२ को खेलमा क्यानाडाले दक्षिण अफ्रिकालाई १–० ले हरायो । ब्रजिलले जापानलाई २–१ ले हरायो ।
पाराग्वेले जर्मनीलाई पेनाल्टी सुटआउटमा ४–३ ले हरायो । त्यस्तै नर्वेले आइभरी कोष्टलाई २–१ ले पराजित गर्यो ।
फ्रान्सले केलियन एम्बाप्पेको दुई गोलको मद्धतले स्वीडेनलाई ३–० ले पराजित गर्यो ।
