रसुवा नाकाबाट भित्रिएको ५ जनाको चिनियाँ टोली काठमाडौंमा अझै सक्रिय
ओली र प्रचण्ड-नेपाललाई मिलाउन चिनियाँ प्रयास, वामदेब सहयोगी भूमिकामा
प्रकाशित २०७७ पुष १९ आइतबार
1.2k
Shares
काठमाडौं। औपचारीक फुटको चरणमा पुग्नुअघीको नेकपालाई मिलाउने प्रयासमा चीनले प्रयास जारी राखेको अन्तराष्ट्रिय समाचार माध्यममा समाचार आइरहँदा चिनियाँ कम्युनिष्ट पार्टीका ५ जनाको टोली नेकपा मिलाउने अन्तिम प्रयासमा जुटेको तथ्य हाम्राकुराले फेला पारेको छ । उच्च सुरक्षा स्रोतका अनुसार नेकपाका विवाद मिलाइ नेकपालाई एक बनाउन दुई पटक गरि नेपाल आएको ५ जनाको चिनियाँ टोली सक्रिय भएर काम गरिरहेको छ ।
कतिपय भारतीय पत्रिकाले चिनियाँ राष्ट्रपति सि चिनफिङले नेपालको राजनीतिक कोर्षलाई प्रभावित पार्ने गरि ३ सदस्यीय टोली नेपालमै राखेको बताए पनि सो टोली ५ जनाको रहेको सुरक्षा स्रोतको दावी छ । नेपाल आएको चिनियाँ टोली डिसेम्बर महिनामा दुई अलगअलग दिनमा नेपाल आएका अध्यागमनको रेकर्डमा पाइएको छ।
नेपालमा रहेका ति ५ जनाको चिनियाँ टोली रसुवा हुँदै काठमाडौंमा उत्रिएको पाइएको हो । ५ जनामध्ये युकुन लाई, डोङमे ह्वाङ र योग्लिन झोङ डिसेम्बर पहिलो साता रसुवा नाका हुँदै काठमाडौं आइपुगेका थिए । हेयान सुन र बोजान लियान भने डिसेम्बर २६ मा रसुवा हुँदै काठमाडौं झरेका थिए । उनीहरु सबैले कुटनीतिक पासपोर्ट प्रयोग नगरि साधारण पासपोर्ट नै प्रयोग गरेर नेपाल आएका थिए । यिनै ५ जना अहिले हालै ४ दिने नेपाल भ्रमण सकाएर गएका यचौंको टोलीले शुरु गरेको कामलाई मिलाउने जिम्मा लिएर काममा खटिएको स्रोतको दावी छ ।
चिनियाँ कम्युनिष्ट पार्टीको नेकपा औपचारीक रुपमा फुट्नु अघी नै मिलाउने प्रयासमा नेकपाको कुनै पनि गुटमा नदेखिएका नेता वामदेब गौतम लागिपरेका छन् । यसका लागि गौतमले प्रधानमन्त्री केपी शर्मा ओलीदेखि प्रचण्डहरुसँग पनि भेट शुरु गरिसकेका छन् । उनी अहिले कुनै गुटमा सहभागी नभइ पार्टी मिलाउने अभियानमा जुटेको उनी निकटहरु बताउँछन् । अभियानमा केन्द्रीय नेताहरुको त्यति साथ नभएपनि जिल्ला तहका नेता कार्यकर्ताहरु जोडिने अनुमान गौतमले गरेका छन्।
