झापा । झापाको गौरादह नगरपालिकामा कोरोना भाइरस कोभिड -१९ विरुद्धको भ्याक्सिन "कोभ्याक्स खोप" मङ्गलवारबाट लगाउन सुरु गरिएको छ । गौरादह नगरपालिका स्वास्थ्य शाखा द्वारा पहिलो चरण अन्तरगत अग्रपङ्क्तिमा काम गर्ने जनप्रतिनिधिहरू , सरकारी कर्मचारीहरू , पत्रकारहरू , सुरक्षाकर्मीहरू , वित्तीय संस्थाका कर्मचारीहरू , सहित यस अघि प्राथमिकतामा परि खोप लगाउन छुट भएका नगरपालिकाका स्वास्थ्य कर्मीहरू तथा महिला स्वास्थ्य स्वयंसेबिकाहरुले कोरोना भाइरस कोभिड- १९ विरुद्धको खोप लगाएका छन् ।
खोप कार्यक्रम अन्तरगत गौरादह नगरपालिका महिला विकास शाखामा कार्यरत ५८ वर्षीय महिला विकास निरीक्षक मिरा भट्टराईलाई पहिलो खोप लगाइदिएर खोप कार्यक्रम सुचारु गरिएको नगर स्वास्थ्य शाखाका स्वास्थ्य सह-संयोजक सि.अ. हे. ब. गोविन्द श्रेष्ठले जानकारी दिएका छन् ।
जिल्ला स्वास्थ्य कार्यालय द्वारा तोकिएको मिति अनुरूप मङ्गलवार गौरादह नगरपालिकामा बसोबास गर्ने सम्बन्धित हरूलाई निर्धारित समय बिहान १० बजे देखि नगरपालिका कार्यालय परिसरमा कोरोना विरुद्धको खोप लगाउन सुरु गरिएको थियो । जसअन्तर्गत ४२ जना पुरुष र १३६ जना महिला गरी १७८ जना व्यक्तिहरूले कोरोना विरुद्धको खोप लिएका छन् ।
कोरोना विरुद्ध खोप लगाउनेमा १८ जना जनप्रतिनिधि , ७४ जना सरकारी कर्मचारी , ६ जना पत्रकार ,२२ जना सुरक्षाकर्मी १२ जना छुट स्वास्थ्यकर्मी , ४२ जना बितिउ संस्थामा कार्यरत व्यक्ति र ४ जना छुट महिला स्वयम सेविकाहरूले कोरोना बिरुद्द्को खोप लगाएको गौरादह नगर स्वास्थ्य शाखाका स्वास्थ्य संयोजक जनस्वास्थ्य अधिकृत पर्सुराम भट्टराईले जानकारी दिएका छन् ।
