बुलिङ्गटारमा जिप दुर्घटना : एक जनाको ज्यान गयो, तीन जना गम्भीर घाइते

सञ्जय भट्टराई,

प्रकाशित २०७८ वैशाख १० शुक्रबार

कावासोती । पूर्वी नवलपरासीको बुलिङ्गटार गाउँपालिकाको वडा नं ६ को बर भन्ज्याङमा जिप दुर्घटना हुँदा १ जनाको ज्यान गएको छ ।

दलदलेबाट डेढ गाउँको लागि छुटेको लु १ ज ३७१० नं को जिप दुर्घटना हुँदा जिपमा सवार पाल्पा रामपुर घर भएका अजय बिकको मृत्यु भएको हो । दुर्घटनामा ३ जना गम्भीर घाइते भएका बुलिङ्गटार प्रहरी चौकीका प्रहरी नायब निरीक्षक मोहन थापाले बताए । घाइतेहरूको विवरण नखुलिसकेको थापाले बताए ।

दुर्घटनामा गम्भीर घाइते भएका तीन जनालाई थप उपचारको लागि कावासोती तर्फ पठाइएको स्थानीय रामचन्द्र रानाभाटले बताए । १६ जना यात्रु बोक्ने क्षमता भएको जिपले क्षमता भन्दा धेरै यात्रु बोकेर हिँडेको हुँदा दुर्घटना भए स्थानीयले बताएका छन् ।