उपत्यकाका सिडियो कार्यालयबाट दिइने अत्यावश्यक बाहेकका सेवा सोमवारबाट बन्द

हाम्राकुरा संवाददाता

प्रकाशित २०७८ वैशाख १२ आइतबार

काठमाडौं । उपत्यकाका तीन जिल्ला काठमाडौं, भक्तपुर र ललितपुर जिल्ला प्रशासन कार्यालयले अत्यावश्यक बाहेकका सेवा बन्द गर्ने निर्णय गरेका छन् ।

आइतबार बसेको तीनै जिल्लाका प्रमुख जिल्ला अधिकारीहरूको संयुक्त बैठकले कोरोना महामारीको बढ्दो जोखिमका कारण अत्यावश्यक बाहेकका सेवा एक साताका लागि बन्द गर्ने निर्णय गरेको हो ।

काठमाडौँका प्रमुख जिल्ला अधिकारी कालीप्रसाद पराजुलीले प्रशासन कार्यालयबाट हुँदै आएका नयाँ नागरिकता प्रमाणपत्र र प्रतिलिपि वितरण, राहदानी बनाउने काम पत्रपत्रिका तथा संघ संस्था दर्ता, राष्ट्रिय परिचय पत्रका लागि हुँदै आएको नाम दर्ता गराउने लगायतका काम एक साताका लागि बन्द गरिएको जानकारी दिए ।

उनका अनुसार शान्ति सुरक्षाका मुद्दा, ठाडो निवेदन लगायतका विषयसहित दैनिक रूपमा गरिनु पर्ने अत्यावश्यक सेवाका काम मात्रै यस बीचमा प्रशासन कार्यालयबाट प्राप्त हुनेछन् । यो निर्णय सोमबारदेखि लागू हुने प्रशासन कार्यालय काठमाडौंले जनाएको छ ।