डोटीमा महिलामाथि जिउँदै आगो लगाइयो, स्वास्थ्य अवस्था गम्भीर

प्रकाश बम

प्रकाशित २०७८ जेठ १४ शुक्रबार

डोटी । डोटीमा एक महिलामाथि जिउँदै आगो लगाइएको छ । आदर्श गाउँपालिका वडा नम्बर ४ रोडिङ्गे गाउँकी २८ वर्षीया लक्ष्मी भाट आफ्नै पसलमा सुतिरहेको अवस्थामा अज्ञात व्यक्तिले प्रज्वलनशील पदार्थ छर्केर आगो लगाएको हो ।

मध्यरातिको समयमा भाटको शरीरमा आगो लगाइएको प्रारम्भिक जानकारी प्राप्त भएको जिल्ला प्रहरी कार्यलय डोटीले जनाएको छ ।

आगोले जलेर गम्भीर घाइते भएकी भाटको राजपुर स्थित सुजंङ्ग अस्पतालमा उपचार भैरहेको जिल्ला प्रहरी कार्यालय डोटीका प्रहरी उपरीक्षक दान बहादुर मल्लले जानकारी दिए ।

प्रहरी उपरीक्षक मल्लले भने, ‘प्रज्वलनशील पदार्थ पेट्रोल हो वा मट्टीतेल, त्यो खुल्न सकेको छैन । घटनाको अनुसन्धान नजिक हामी पुगिसकेका छौं। यस्ता अपराधीक क्रियाकलापमा संलग्न ब्यक्ती अथवा समूहलाई पक्राउ गरेर कानुनी दाएर लाइने छ ।’

घाइतेकोे स्वास्थ्य अवस्था गम्भीर रहेको सुजंङ्ग अस्पतालका प्रशासन प्रमुख अर्जुन बलायरले बताए । घाइतेको दुबै खुट्टा ,अनुहार , पेट र दायाँ हातमा गम्भीर चोट रहेको बलायरले बताए ।

गम्भीर चोट भएकोले घाइते महिलालाई अस्पतालले रेफर गरेपनि आर्थिक अभावका कारण बाहिर लैजान नसकिएको उनका आफन्तको भनाइ छ ।