कोपा अमेरिकामा ब्राजिलको शानदार शुरूआत, नेयमार पेलेको कीर्तिमान नजिक
हाम्रा कुरा
प्रकाशित २०७८ जेठ ३१ सोमबार
1.3k
Shares
काठमाडौं । ब्राजिलले कोपा अमेरिका फुटबलमा विजयी शुरूआत गरेको छ । आयोजक ब्राजिलले उद्घाटन खेलमा भेनेजुएलालाई पराजित गरेको हो । आइतबार राति भएको खेलमा भेनेजुएला ३–० गोल अन्तरले पराजित भयो ।
स्टाडियो नेसनल डी ब्रासिलियामा भएको खेलमा घरेलु टिमलाई जित दिलाउन मार्क्विन्होस, नेयमार र गाब्रियल बार्बोसाले एक एक गोल गरे ।
नेयमारले पेनाल्टीमार्फत गोल गरेका हुन् । देशका लागि नेयमारको यो ६७ औं गोल हो । नेयमारले पेलेको कीर्तिमान भंग गर्ने अपेक्षा गरिएको छ । नेयमार पेलेभन्दा १० गोलले पछि छन् ।
यस जितसँगै समूह बी मा रहेको ब्राजिलले पहिलो खेलमै महत्वपूर्ण ३ अंक जोडेर समूहको शीर्ष स्थानमा रहेको छ । भेनेजुएला पुछारमा रहेको छ ।
कोलम्बिया भर्सेस इक्वेडर
यो समूहको अर्को खेलमा कोलम्बियाले इक्वेडरलाई पराजित गरेको छ ।
कोलम्बिया १–० गोल अन्तरले विजयी भयो । कोलम्बियाका लागि खेलको ४२ औं मिनेटमा एडविन कार्डोनाले निर्णायक गोल गरे ।
