माफ गर!!!
मेरो प्रिय....
म अझै मरेकी छैन
श्रद्धाञ्जली दिने नाममा
अँजुली उठाउने तिम्रो इच्छा
पुरा हुन पाएको छैन।
मलाई थाहा छ
तिमीलाई मेरो याद मिठो लाग्दैन
आफ्नो सिङ्गो अतीत मेटाएर
मेरो नाममा तर्पण दिन
मन छ तिमीलाई
तर...
आजसम्म तिम्रो खुसीमा
साथ दिन सकेको छैन
तिम्रो निष्कलंकित कल्पनाको बिहान
तिमी सामु
आएको छैन
दुर्भाग्य!!!
म अझै मरेकी छैन
तिमी चाहन्छौ ती सन्तानले
आमा सोच्नु नपरोस्
छोरा छोरीले
आमा भावनामै घृणा गरुन्
यो पृथ्वी एक पटक हल्लियोस्
र म कतै हराऊँ
यो धरती फाटोस्
र म त्यहीँ बिलाऊँ
दुर्भाग्य.....
ईश्वरको अदालतमा
तिम्रो पक्षमा फैसला नहुँदा
तिम्रो मन चङ्गा हुन सकेको छैन
म मरेकी छैन
मलाई ती सुखद बैँसहरूले भन्दा
मेरो मातृत्वले तिम्रोनजिक राखेको छ
मेरो निशानी बिर्सन खोजेका
मेरा सन्तानको अनुहारमा
मलाई म खोज्न मन छ
सपना र इच्छा
हुँदो रैछ सवैमा
हो म त्यै अँध्यारोमा
जुनकिरी बनेर
उडिरहेकी छु
आवश्यक परे ......
मरी ..भनिदिए हुन्छ
प्रिय
हो म अझै
मरेकी छैन.....
