काठमाडौं । अन्तर्राष्ट्रिय फुटबलको प्रि–सिजन तयारी शुरु भएको छ । जस अन्तर्गत विभिन्न चर्चित क्लबहरुले अन्य देशका क्लबहरुसँग मैत्रिपूर्ण खेल खेलिरहेका छन् । 

जसअन्तर्गत पहिलो मैत्रीपूर्ण खेलमा इन्टर मिलानले जित निकालेको छ । इटालियन सिरी ए च्याम्पियन इन्टरले शनिबार राति स्वीस क्लब लुगानो एफसीलाई पेनाल्टी सुटआउटमा ४–३ ले हरायो ।   

खेलको निर्धारित समय २–२ गोलको बराबरीमा सकिएपछि खेल पेनाल्टी सुटआउटमा गएको थियो । पेनाल्टीमा इन्टरले बाजी मार्यो ।

यससँगै इन्टरले लुगानो कपको उपाधि समेत जितेको छ ।

त्यस्तै प्रि–सिजनको पहिलो मैत्रीपूर्ण खेलमा जर्मन बुन्डेस लिगा च्याम्पियन बायर्न म्युनिख पराजित भएको छ । शनिबार राति भएको खेलमा बायर्न बुन्डेस लिगा प्रतिद्वन्दी एफसी कोल्नसँग ३–२ गोल अन्तरले पराजित भएको हो।

एमएस टेक्नोलोजी एरिनामा शुरुआती  अग्रता जोगाउन नसक्दा बायर्न पराजित भएको हो । खेलको छैटौं मिनेटमा अर्मिन्डो सिएबले गोल गर्दै बायर्नलाई अग्रता दिलाएका थिए ।

तर २० औं मिनेटमा जान थिलमानले गोल गर्दै कोल्नलाई १–१ गोलको बराबरीमा ल्याए । २७ औं मिनेटमा मार्क उथले गोल गर्दै कोल्नलाई २–१ को अग्रता दिलाए ।

खेलको ३५ औं मिनेटमा जोशुवा जिर्कजीले गोल गर्दै बायर्नलाई २–२ गोलको बराबरीमा फर्काए । ५६ औं मिनेटमा मार्कले व्यक्तिगत दोस्रो गोल गर्दै कोल्नलाई ३–२ को जित दिलाए ।

शनिबार ११ दर्जन खेल भएका छन् । यस्तो छ अन्य मुख्यमुख्य क्लबका खेलको नतिजा
पेरिस सेन्ट जर्मेन २–२ चाम्ब्ली
फेयनुर्ड ३–३ वेडर ब्रेमेन 
शेफिल्ड वेनस्डे ०–२ बार्नस्ली
कार्डिफ सिटी ०–२ क्याम्ब्रिज युनाइटेड
बोरुसिया मुन्चेनबाच १–३ पादरबर्न
बोरुसिया डर्टमण्ड १–३ बोचुम
रेन्जर्स २–२ आर्सनल
विन्टरथुर ०–४ रियाल बेटिस
ह्याम्बर्गर एसभी १–० बाजल
लेन्स २–२ ले हाभ्रे
एथलेटिक बिलबाओ १–२ सेन्ट गालेन
बायर्न म्यूनिख २–३ एफसी कोल्न
लिटन ओरेन्ट १–१ टोटनह्याम हट्सपर
रियाल सोसिडाड ६–१ हुएस्का
सेभिया ४–० कोभेन्ट्री सिटी
निस २–१ डाइनामो किभ
लियोँ ४–१ वुल्फबर्ग