जनकपुरधाम । महिलालाई पेस्तोल देखाएर बलात्कार गरेको आरोपमा एक व्यक्ति पक्राउ परेका छन् । शम्भु महरा भन्ने शम्भु रबीदासलाई धनुषा प्रहरीले हतियार देखाएर महिलालाई बलात्कार गरेको र लुटपाटको आरोपमा पक्राउ गरेको हो ।
शनिवार दिउँसो जनकपुरधाम उपमहानगरपालिकाको कपिलेश्वरस्थित रेल्वे लिकबाट पक्राउ परेका उनलाई आइतबार जिल्ला प्रहरी कार्यालय धनुषाले सार्वजनिक गरेको हो ।
पक्राउ परेका शम्भु रबीदास कमला नगरपालिका वडा नम्बर ८ का हुन् । घरबाट पानी लिन निस्किँदा कमला नगरपालिका वडा नम्बर ८ की एक महिलालाई पेस्तोल देखाएर रामचन्द्र मण्डल खत्वे समेतको समूहले पालैपालो बलात्कार गरेको प्रहरीको भनाइ रहेको हो। उक्त समूहले महिलाले लगाएको गरगहना समेत लुटपाट गरेको थियो ।
प्रहरीले घटनाको अनुसन्धान पश्चात् संलग्नहरूमाथि हातहतियार, डाँका र जबरजस्ती करणी मुद्दाको मिसिल जिल्ला अदालतमा पेस गरिसकेको छ । घटनामा संलग्न अन्य अभियुक्तहरूको पनि खोजी भइरहेको प्रहरी स्रोतले जानकारी दिए।
