आफ्नै रंगशालामा रमाउँदै नेपाली चेलीहरु, भिड्दै बंगलादेशसँग
पहिलो पटक महिला सिनियर टिमले दशरथ रंगशालामा खेल्ने अवसर पायो, विदेशी प्रशिक्षकको प्रशिक्षण पायो
हाम्रा कुरा
प्रकाशित २०७८ भदौ २७ आइतबार
577
Shares
काठमाडौं । नेपाली राष्ट्रिय महिला फुटबल टिमले आइतबार बंगलादेशसँग दोस्रो मैत्रीपूर्ण खेल खेल्दैछ। अहिलेसम्म बंगलादेशसँग खेलेका ७ भिडन्तमा सबै खेल जितेको नेपालले यो खेल पनि जितेर आफ्नो रेकर्डलाई अगाडि बढाउन चाहन्छ ।
नेपालले घरेलु मैदान त्रिपुरेश्वरस्थित दशरथ रंगशालामा बंगलादेशसँग साँझ ५ बजेदेखि खेल्नेछ । नेपाली सिनियर टिमले आइतबार दोस्रो पटक दशरथ रंगशालामा खेल्ने मौका पाएको हो ।
अहिलेसम्म महिला सिनियर टिमले दशरथ रंगशालामा पाइला टेक्न पाएको थिएन । बिहीबार रंगशालामा गरेको डेब्युमा नेपालले बंगलादेशलाई २–१ गोल अन्तरले हरायो ।
नेपालको जितमा डेब्यु खेलाडीद्धय सबिता राना र प्रीति राईले एक एक गोल गरेका थिए । हाफ टाइमसँग २–० ले अग्रता लिएको नेपालले हाफ टाइमपछि गोल खाएको थियो । बंगलादेशकी तोहुरा खातुनले एक गोल फर्काएकी थिइन् ।
पहिलो खेलमा नेपाली चार खेलाडीले डेब्यु गरेका थिए । पहिलो पटक विदेशी प्रशिक्षकले सम्हालेको महिला राष्ट्रिय टिममा दोस्रो खेलमा थप तीन खेलाडीले डेब्यु गर्ने सम्भावना छ । प्रशिक्षक ग्यारी फिलिप्सले मैत्रिपूर्ण खेलमा सात खेलाडीलाई डेब्यु गराउने सोच बनाएका हुन् ।
दर्शकका लागि साधारण पारापिटतर्फ २०० र भीआईपीतर्फ ५०० रुपैयाँको टिकट राखिएको छ ।
एएफसी महिला एसिया कप–२०२२ छनोटको तयारीका लागि नेपालले बंगलादेशसँग मैत्रीपूर्ण खेल खेलिरहेको हो ।
एएफसी महिला एसिया कप छनोट उज्वेकिस्तानमा आयोजना हुनेछ । छनोटमा नेपालको समूहमा फिलिपिन्स र हङकङ रहेका छन् ।
नेपालले पहिलो खेलमा फिलिपिन्ससँग असोज २ गते र दोस्रो खेलमा हङकङसँग असोज ५ गते खेल्नेछ ।
