काठमाडौं । आईसीसी विश्वकप क्रिकेट लिग–२ अन्तर्गतको त्रिकोणात्मक एक दिवसीय सिरिजको दोस्रो खेलमा नेपाल ओमानसँग पराजित भएको छ । मंगलबार राति ओमानकै मैदानमा भएको खेलमा नेपाल ५ विकेटले पराजित भएको हो । नेपाल लगातार तेस्रो पटक ओमानसँग पराजित भएको छ ।
सन् २०२० मा नेपालमै भएको लिग–२ का दुवै खेलमा नेपाल ओमानसँग पराजित भएको थियो । नेपालको ब्याटिङ र बलिङ दुवै नचल्दा निकै कमजोर हुनुपर्यो ।
खेलमा नेपालले दिएको १ ९७ रनको लक्ष्य ओमानले ३१.१ ओभरमा मात्र ५ विकेट गुमाएर पूरा गर्यो । ओमानको जितमा जतिन्दर सिंहले १०७ रनको शतकीय इनिङ्स खेले । उनले ६२ बलमा ६ छक्का र १२ चौका प्रहार गरे ।
उनको शिकार सबैभन्दा बढी सोमपाल कामी बने । सोमपालको पाँचौ ओभरमा उनले ३ चौका र ३ छक्का प्रहार गर्दै ३० रन जोडेका थिए ।
नेपालका करण केसी र कुशल मल्लले २–२ विकेट लिए । सुशन भारीले १ विकेट लिए । करणले ५ ओभरमा २ विकेट लिए पनि ५२ रन दिएका थिए । त्यस्तै कुशल सबैभन्दा किफायती भए । उनले १० ओभरमा ३८ रनमात्र दिएका थिए । त्यसपछि सुशनले १ मेडन राख्दै १० ओभरमा ४० रन दिएका थिए ।
विक्रम शोब सबैभन्दा महंगा सावित भए । उनले २.१ ओभरमा २९ रन दिए । यो इनिङ्समा सन्दीप लामिछानेले बलिङ नै गरेनन् ।
नेपालको इनिङ्स
खेलमा टस जितेर पहिले ब्याटिङ गरेको नेपालले ४७.४ ओभरमा अलआउट हुँदै १९६ रन बनाएको थियो ।
ओपनर आशिफ शेखमात्र क्रिजमा टिके । उनी ९० रन बनाएर आउट भए । शतक जोड्नबाट बञ्चित भए । उनले ११२ बलमा ७ चौका र १ छक्का प्रहार गरे । उनलाई साथ दिने क्रिजमा कोही नहुँदा अन्त्यतिर उनी अताल्लिन पुगे ।
आशिफको यो एक दिवसीय अन्तराष्ट्रियमा पहिलो अर्धशतक समेत हो । उनी एक दिवसीय अन्तराष्ट्रिय सर्वाधिक उच्च रन बनाउने पहिलो नेपाली ओपनर ब्याट्सम्यानसमेत बनेका छन् ।
त्यस्तै कप्तान ज्ञानेन्द्र मल्ल र करण केसीले समान २१–२१ रन जोडे। रोहित पौडेलले २० रन तथा सन्दीप लामिछानेले १० बलमा १६ रन बनाएर रनआउट भए । उनले १ छक्का र १ चौका प्रहार गरेका थिए ।
ओमानका बिलाल खानले ४७ रन खर्चिएर ४ विकेट लिए ।
नेपालको यात्रा
नेपालले जारी सिरिजमा राम्रो शुरुआत गरेको थियो । सोमबार भएको पहिलो खेलमा नेपालले अमेरिकालाई ५ विकेटले हराएको थियो ।
आफ्नो तेस्रो खेलमा नेपालले शुक्रबार अमेरिकासँग खेल्नेछ । अमेरिकासँग नेपालको दोस्रो खेल हुनेछ ।
ओमानसँग नेपालले आगामी आइतबार दोस्रो खेल खेल्नेछ ।
अंक तालिका
लिग–२ को अंक तालिकामा नेपाल छैटौं स्थानमा यथावत् रहेको छ । नेपालले ६ खेलमा ६ अंक मात्र जोडेको छ ।
ओमान ११ खेलमा १८ अंक जोडेर शीर्ष स्थानमा यथावत् रहेको छ ।
अमेरिका १३ खेलमा १२ अंक जोडेर दोस्रो स्थानमा छ ।
स्कटल्याण्ड ८ खेलमा ९ अंक जोडेर तेस्रो, नामिबिया ७ खेलमा ८ अंक जोडेर चौथो, युएई ७ खेलमा ७ अंक जोडेर पाँचौं तथा नेपाल ६ खेलमा ६ अंक जोडेर छैटौंमा छ ।
पपुवा न्यूगिनी ८ खेलमा अंकविहीन हुँदै पुछारमा छ ।
लिग–२ का शीर्ष तीन टिमले सन् २०२३ को जुलाईमा जिम्बावेमा हुने विश्वकप छनोटमा स्थान बनाउने छन् । नेपालले थुप्रै खेल खेल्न बाँकी भए पनि अबको यात्रा झन् कठिन बनेको छ ।
